hanhan128blog.blogspot.com : han ~ 自家製食譜

顯示具有 han ~ 自家製食譜 標籤的文章。顯示所有文章

2022年5月5日星期四

蝦膠釀雞翼

2022-05-05(星期四）

#夕食

#蝦膠釀雞翼

#海老 #手羽先

今日好清閒所以要搵啲整吓消磨時間 😆

好耐冇整嘅#釀雞翼 🐥

拆雞翼骨最嘥時間 😅

今次用咗#蝦膠 🦐、再加入洋蔥🧅 青蔥

釀雞翼 #食譜 #recipe

材料：

雞中翼連尖（5-6）

蝦膠（一份）

洋蔥，青蔥（切粒）

調味：

胡椒粉 - 少許

鹽 - 少許

老抽 - 一湯匙（雞翼上色用）

做法：

將雞翼洗淨抺乾水份，然後將中間兩支骨拆去

用老抽抺勻雞翼醃半小時（上色）

將洋蔥粒，青蔥粒加胡椒粉，鹽拌勻釀入雞翼中

預熱 #airfryer 180度焗5分鐘取出後轉掃上蜜糖再焗5分鐘即可。

#晚餐#夕食#自家製#料理 #海老手羽餃子 #手作り料理 #家庭料理#料理記録 #簡單料理 #料理日記 #料理写真 #cooking #dinner#homemade #instagram #instaphoto #instafood #instablogger #foodblogger #hanhanmade #airfryer #

2016年3月25日星期五

Rice Burger 米漢堡（食譜）

2016-3-24 made

我同老細喜歡食晏時討論吓晚餐食咩好。

實情係由我問 >今晚想食咩呀？

佢就比意見話 > 不如煮乜煮乜煮乜吖！我聽完後 > 多數否決咗佢提意

其實我一邊聽就一邊自己諗緊煮咩好，佢嘅提意永遠都係只供參考好少錄用，哈哈哈哈！

今次也不例外，因為我已經諗倒整咩嘿嘿。

前一日喺吉豬超市掃咗啲食材都未煮哂，仲有啲鮮牛肉（樣樣淨番少少）同埋細半煲湯，

所以要一鋪過清哂佢！

今晚就食米煩（飯）漢堡啦（好耐冇整喇）

回家後即刻洗米煲飯，摷埋啲小圓形矽膠模出嚟整漢堡飯^0^配埋少少煙肉蘑菇炒露荀，煎釀雞翼+隔夜湯。又可以清埋啲廚餘真開心呵呵！

洋蔥牛肉米飯漢堡食譜～ hanhan

材料：

A.熟米飯兩碗

壽司醋半湯匙

糖一茶匙

B. 洋蔥半個

鮮牛肉 200g

日or 韓式燒肉汁兩湯匙

水半碗

做法：

1. 將煲好米飯加壽司醋糖拌勻將米飯，不'入圓形平底模內壓實實的然後攤凍

2. 落少許油燒熱鑊然後將米飯漢堡放入煎香脆兩面上碟先！

3. 落少許油炒香洋蔥，然後落牛肉一起炒至牛肉7成熟，落醬油炒勻再落水蓋上蓋轉慢火焗至洋蔥軟淋收汁熄火。

在米飯漢堡上唧上蛋黃醬再加入炒好洋蔥牛肉變成漢堡，上碟食得😊

後記

朋友們見我整咗呢個米飯漢堡以為我睇咗某飲食節目介紹了一間米漢堡專門店而跟佢整。

其實真係佢哋唔講我都唔知原來有間咁嘅食店，米漢堡我都唔係第一次整以往都整過了（可能太耐了所以冇人記得）除了米漢堡我仲整過米pizza 嘅呢！

2016年3月15日星期二

白色情人節～櫻花奶凍（食譜）

2016-3-14 made

原來今日係日本人嘅白色情人節（喺fb 見人提起先記得）

我整呢個'櫻花奶凍'只係有咁啱得咁橋

因為今日約咗我的家人們去食飯諗住整啲甜品同大家分享

醒起早前買咗包'鹽漬櫻花'放喺雪柜未用，一於又玩吓花先！

去年用櫻花整咗個'水信玄餅'比家人試，今次就轉玩第二款

櫻花奶凍^^

比我喺柜底摷到一包心型杯模（天生購物狂買買埋埋唔少嘢收埋以備不時之需）哈哈！

係係好靚呢？呵呵

（自大狂又病發喇）^0^

出埋個食比大家有興趣嘅可以試吓跟住整吖！

不過希望撻咗食譜嘅網友轉載後註明出自何人何處，雖然我出食譜係真想同愛好煮食嘅網友分享，但都唔想去遊遊蕩蕩時發現一啲鍾意'欺世盜名'嘅無恥之徒用她人心血受讚領功囉！

櫻花奶凍食譜～ hanhan

鹽漬櫻花 1包

Part 1. 底層白色

3.6牛奶 1000ml

淡忌廉 450g

魚膠粉 20g

砂糖 80g

Part 2. 面層透明

魚膠粉 12g

砂糖 30g

熱水 160ml

凍開水 200ml

做法：

1. 用食用水浸洗去除花上鹽份，然後再過2次水後浸開花瓣備用

2. 將part 1 材料倒入鍋中用小火慢煮至糖魚膠粉完全溶化（其間要不停慢搞拌以免燶底）

3. 將2.過篩後放涼然後倒入杯模2/3滿放雪柜雪至凝固

4. 將part 2 魚膠粉+凍水後用熱水坐溶，糖+熱水拌勻後倒入魚膠水內拌勻-過篩 -放涼備用

5. 將雪至凝固嘅奶凍取出，將浸好櫻花放上杯模中再倒入魚膠糖水然後入雪柜雪至凝固即可。

*想有層次感睇落靚啲可加多一層用士多啤梨奶做底層奶凍，中層做白色嘅奶凍，面層櫻花透明啫喱*

2015年10月14日星期三

花膠椰子杞子煲竹絲雞（食譜）

2105-10 -11(made)

秋風起又係我煲湯嘅時候^^

我個人比較怪，夏天唔多鍾意飲湯，只會間唔中煲啲簡單湯水嚟應酬吓我老細：目

但一到入秋就會抽起條筋好想飲老火湯：P

由其是呢款 > 椰子煲杞子煲竹絲雞

椰子同杞子嘅香甜+埋竹絲雞嘅滋補，再加花膠女任們飲多兩碗連保濕面膜都可以撻少兩塊呀：目

今次買椰子有着數呀，哈！

因為買大送細囉，買'椰'送子，亞姐一劈開個椰子見有仔（巧打耳哦）仲即刻同我講話我會有好運到喎:D（如果係就好囉，要勤啲去買六合彩先）$_$

花膠椰子杞子煲竹絲雞 (食譜 ) by Hanhan

材料：

椰子一個（水份留起備用）

杞子兩湯匙（浸軟後去水備用）

竹絲雞一隻（可叫雞檔代去皮）

花膠幾片（我用事先發好嘅花膠）

做法：

1. 先煲一大鍋水

2. 將雞沖洗去清內臟

3. 椰子肉切條後沖洗乾淨備用

4. 水滾後將雞 ,椰子肉一同下鍋用大火滾1小時後轉中火煲45分鐘

5. 然後加入花膠，椰子水再煲15分鐘

6. 最後再加入埋杞子煲多15分鐘即可加鹽調味

2015年10月12日星期一

懷舊糯米包（食譜）

3015-10-10秋風起～食臘味～^^

終於等到秋風到喇^0^

唔使再日日熱C辣辣

唔使再晚晚都開冷氣先瞓倒

唔使再朝朝早起身都不停打噴嚏

唔使再鼻塞到抖唔倒氣喇 yeah yeah yeah !

今日一於整籠 '臘味糯米包'嚟慶祝吓先^^

呢款舊式點心我已經想整好耐，因為而家好少酒樓會整，想食就要去一些舊式茶樓先有機會食倒，仲要等秋冬季節先會推出！

今日終於的起心肝自己整～嘿嘿！

臘味糯米包食譜：by hanhan

先將2杯糯米浸熱水3小時，然後隔水蒸35分鐘。

將冬菇5粒，蝦米一湯匙，瑤柱一湯匙浸軟 +臘腸潤腸各半條切細細粒爆香。（喜歡蔥花可加入）

生抽，甜豉油各一湯匙 + 半杯熟水+少許糖拌勻較啱合自己嘅味道後分幾次拌入蒸好糯米飯中撈至上色。

將炒好嘅臘味材料同糯米飯拌勻。

然後包上黃皮再落鑊隔水蒸8分鐘即可。

2015年9月4日星期五

反沙甜薯 sweet potato (食譜）

2015-8-7

前幾日買咗一包日本甜薯食淨兩條，今日要清埋佢，否則再擺落去如果擺到又發芽我可能又會手痕痕拎去種：目

諗起曾經食過嘅潮式反沙芋（好好味呢）

一於用蕃薯嚟做一個 hanhan 版反沙蕃薯，哈哈哈哈！

我呢個簡易版做出嚟效果都唔錯，每片甜薯都包上一層半溶砂糖，甜甜脆脆（老細食完一嚿接一嚿）嘿嘿

舊曆七月十四日（嘩鬼）回外家食飯又整比家人做飯後甜品食（一至好評哦）（哈哈好滿足哦）^0^

2/9 人妻火鍋聚我又整咗比班好友佢哋試，一拎出嚟好快就掃哂～呵呵

*見大家都鍾意食我整嘅呢個甜品真係好開心好有滿足感*

做法一啲都唔難，真係好易做易過整反沙芋好多，嘻！

Sweet sweet potato 食譜～ hanhan

日本甜薯 2-3個（揀比較圓身大隻嘅）

砂糖。 3大湯匙

油。半湯匙

水。少許

做法：

1. 先將甜薯洗淨印乾水份後連皮切薄片

2. 落半湯匙油燒熱後落蕃薯片用中火煎（要反覆煎兩面，其間洒少許水落鑊目的讓蕃薯片受到水蒸氣會易熟透）

3. 煎至蕃薯片轉哂色後用竹簽吉一吉中心見淋淋哋就落砂糖快手兜亂（讓每片蕃薯片都沾滿半熔化砂糖

4. 見砂糖差不多全熔化後即可上碟

*襯熱食可以吃到脆糖口感*

2015年5月19日星期二

Philips 豆漿濃湯機～第一機簡簡單單又好味》黑芝麻豆漿！

Philips 豆漿濃湯機～第一機食譜《簡簡單單又好味》黑芝麻豆漿！

只要預備好材料放入機內開動約30分鐘就可以享受到美味豆漿喇👍
黑芝麻豆漿～ hanhan 食譜
材料：⋯⋯
黑豆 180g
黑芝麻 25g
冰糖 25-30g
水

做法：
1. 先將豆黑洗淨用清水浸9小時以上
2. 黑芝麻用白鑊炒香
3. 將以上兩樣材料放入'豆漿濃湯機'內再將水注入至Max與Min之間蓋上蓋鎖好後按 Soymilk(豆漿)功能
4. 打好豆漿後襯熱將冰糖加入拌至溶化
5. 用篩隔去豆渣後即可飲用。

Philips 豆漿濃湯機～食譜第二機》蟹肉南瓜忌廉湯

Philips 豆漿濃湯機～第二機》蟹肉南瓜忌廉湯

今次試咗用 '濃湯功能'做了個南瓜蟹肉忌廉湯，只須將材料放入機內話咁快就有美味濃郁嘅湯飲真係方便到不得了呢👍🏻
南瓜蟹肉忌廉湯食譜～by hanhan ⋯⋯
材料：
南瓜 450g
洋蔥 50g
蟹肉 200g
淡忌廉 50g
鹽少許
水

做法：
1. 先將蟹洗淨蒸熟拆肉備用
2. 南瓜與洋蔥切粒粒
3. 將以上材料倒入豆漿濃湯機內再將水注入至Max與Min之間蓋上蓋鎖好後按（Puréed soup 濃湯功能）
4. 聽到咇咇聲後打開煲蓋將鹽加入調味
5. 將淡忌廉加入湯內拌勻即可享受鮮味嘅南瓜蟹肉忌廉湯

2015年5月15日星期五

Philips 豆漿濃湯機食譜～第四機「紅豆薏米糊」

2015-5-15

我又玩嘢喇，hehe

今日用咗部 '豆漿濃湯機'試吓個米糊功能做咗個紅豆薏米糊

因為近年暴飲暴食肥咗好多（我已經知衰喇）T^T

呢排都有去吓跑步，行吓樓梯同減少食量

可惜我咁努力都冇瘦到 >.<"

睇中醫醫師話我濕重體虛，要多食去濕食物去隨體內濕氣，水腫，血氣行得好減肥就好easy

所以今日即刻走去買咗包紅豆同埋薏米

因為紅豆，薏米都含有大量膳食纖維，能夠促進腸蠕動，潤腸通便，幫助排走毒素，健脾去濕，解決虛胖令臉色紅潤，女性多吃有益呢！

今日就開始我嘅瘦身養身食療先^0^

紅豆薏米糊～ Han made

材料：

紅豆。 100g

薏米。 50g

冰糖。 50g

水

做法：

1. 先將紅豆浸3小時，薏米浸1小時後隔水備用

2. 將紅豆薏米放入'豆漿濃湯機'內，加水至max & min 之間

3. 蓋上蓋後選擇rice paste(米糊）功能，完成後加入冰糖拌溶即可享用

2015年5月3日星期日

Philips 豆漿濃湯機～第三機，卡邦尼芝士年糕

2015-05-03
病咗差不多一星期每日唔係飲藥就係食粥或者通粉&豬仔包（唔知點解每次生病都喜歡食芝麻豬仔包）：P
呢兩日終於趕走咗病魔，～ yeah
口啖啖咗多日好想食啲濃味食物刺激番味蕾^^
今日行超市竟然比我再遇上（你）yeah yeah yeah ~
煮意嚟喇！
就係卡邦尼芝士年糕

曾經在某食店食過呢款年糕，覺得唔錯，今晚一於試吓自家製先嘻嘻！

我仲搵咗個好幫手》就係 Philips 嘅豆漿濃湯機。

今次用咗Chunky soup(粒粒湯功能）

只須將預備好嘅材料放哂入機內加水然後鎖上蓋按制開動我就可以離開去做其他嘢

唔水半粒鐘當聽到咇咇聲後即係製作完成，有得食喇真係超方便呢。

卡邦尼芝士年糕～ hanhan made

材料：

韓式年糕。 400g

芝士。兩片

煙肉。兩條（切幼條）

洋蔥。半個（切幼條）

淡忌廉。 250g

蛋黃。 1隻（打發成蛋液）

蘑菇。 4粒（切細粒）

香草。半茶匙

水

做法：

1. 將年糕沖一沖水備用

2. 將煙肉，蘑菇，洋蔥用少許油炒香備用

3. 將以上材料放入'豆漿濃湯機'內再加入淡忌廉，芝士片，蛋黃，香草。

4. 然後加水至Max與Min之間，蓋上蓋後選擇Chunky soup(粒粒湯功能)然後開動。

完成後即可享用。

2015年4月4日星期六

消暑去濕飲品～薏米檸檬蜜

2015-3-28

近期天氣濕濕又悶熱，瞓醒起身都感覺仲好攰好似冇瞓過咁（懶就懶啦）

係時候煲番啲去濕飲品清清體內嘅濕氣

今日煲呢個薏米檸檬蜜，因為齋薏米水老細唔多好

所以我會加入檸檬蜜糖拌飲（氹細路手法）氹老細飲:P

加咗檸蜜嘅薏米水除咗可以去水利尿仲有美白功效所以女生們應該多飲^_^

薏米檸檬蜜～ by hanhan ^^

生薏米 110g

熟薏米 65g

洋薏米 60g

水 4公升

檸檬汁

片糖（我用蜜糖）

將所有材料洗淨，煲滾水後落薏米煲一小時。

放涼後加入檸檬汁蜜糖拌勻雪凍飲可消暑解渴利尿去水腫可以減肥又美白呢😉

可將三種薏米量好份量再分好一份份個別包好每次用就方便得多。

*我喜歡一次買幾個檸檬洗淨切片然後

倒入蜜糖放雪柜浸一星期，就隨時可以拎幾片檸檬加+幾羹檸檬蜜沖水飲*

2015年1月12日星期一

補補～花膠木瓜燉鮮奶（食譜）

2015-01-11

新年將至又要開始預備過年食品

喺籠底摷咗三隻大花膠筒出嚟預備KO佢

浸咗兩日水尋晚用薑蔥出埋水發透後就將佢哋剪開幾份然後再用保鮮紙pack好放入冰格隨時可以拎一份出來食用

今晚我已經忍唔住拎咗一小份嚟燉咗個好滋補嘅"花膠木瓜燉鮮奶"喇哈哈！

順便用吓個新玩具^0^

花膠木瓜燉鮮奶（一人份）hanhan

材料：

花膠 50-80g（要先發好）

木瓜 100g（去皮去核切小件）

鮮奶 236ml (小盒裝一盒）

做法：

將所有材料放入燉盅內隔水用文火燉1小時即可。

*喜歡甜啲可以加入冰糖同燉*

2014年12月8日星期一

椰子杞子竹絲雞煲栗子 (食譜 )

天氣開始凍我的湯水部又要運作喇！

整整一個夏天都冇乜煲過湯（熱到冇意慾飲湯）

但天氣一涼我就會有想飲湯嘅慾望

尋晚突然諗起了這個湯

嘩，好想飲呀!

今日即去街市買齊材料整番煲靚飲吓先

以往我只用竹絲雞椰子杞子呢三樣材料去煲 , 今次加埋栗子去煲整煲湯都特別甜潤 ^^

椰子杞子竹絲雞煲栗子 (食譜 ) by Hanhan

材料：

椰子一個（水份留起備用）

杞子兩湯匙（浸軟後去水備用）

竹絲雞一隻（可叫雞檔代去皮）

栗子半斤（用熱水烚3分鐘然後去衣）

做法：

1. 先煲一大鍋水

2. 將雞沖洗去清內臟

3. 椰子肉切條後沖洗乾淨備用

4. 水滾後將雞 ,椰子肉, 栗子一同下鍋用大火滾1小時後轉中火煲45分鐘

。然後加入椰子水再煲15分鐘之

後再加入埋杞子煲多15分鐘即可加鹽調味

2014年11月21日星期五

台式紫薯花花芋圓 ~ 食譜

手殘了半年有多最近終於有好轉

多得朋友介紹的推拿師

雖然未完全康復，但起碼已經可以用倒力握緊權頭
但都要盡量避免拎重物與長時間做同一動作太耐 , 例如按鍵盤打字 , 用打蛋器等 .

手傷期間耐不耐都有做吓麵包小食等不須太用手力嘅止吓痕

最近見手傷都開始有8成復完已經心癮難耐開始復工，密密入廚整嘢食

上星期就做了這個台式紫薯芋圓

我仲貪得意用花形模吸出一朵朵花花

效果唔錯朋友們大讚靚靚 ~ 呵呵

台式紫薯芋圓花花版 ~

材料

A. 紫心蕃薯蓉 250g (或黃蕃薯）

木薯粉 100g

熱水 50g

B. 芋頭蓉 250g

木薯粉 100g

糖粉 50g

熱水 50g

做法：

1. 將材料A混合後搓至不黏手然後分做兩等份

2. 將材料B混合後搓至不黏手然後分做3等份

3. 先將一份B料粉皮碌開約3mm

4. 再將一份A料粉皮碌開闊度跟B料相等然後疊在上層

5. 再將一份B料碌開疊上去，如是者梅花間竹疊至五層後再輕手壓一壓粉皮讓其更黏合不易甩開

6. 疊緊後就可以用模具吸出做形或切成粒粒

7. 完成後灑上少許麵粉然後放入冰格冷藏備用

提示：

*搓好後的粉糰碌開時可能會比較黏,須要灑上麵粉才碌會比較好*

*蕃薯芋頭我會先去皮然後切成粒粒再落鑊隔水蒸15-18分鐘再拌入木薯粉糖粉搓勻*

*吸完花花後淨下啲粉皮唔好嘥，我將佢哋再搓勻然後再做形 ^0^ *

2013年11月17日星期日

近排天氣開始有少少涼意 , 朋友們已經急不及待大開食戒
大閘蟹 + 火鍋食完一輪又一輪
差不多隔一日就有一餐 , 一星期內已經食咗4 轉喇
自己都食到覺得有啲過份 ~ hehe
見今日冇飯局一於煲粥食清清哋比條腸抖吓先 !
簡簡單單咁煲咗一煲粟米粥
再配一碟好耐冇整我至 like 嘅味菜牛柳絲煎麵

酸酸甜甜又爽脆嘅咸酸菜 ( 其實係甜多咸嘅呢 ) ^^
加埋用黑椒醃嘅牛柳絲同煎到面層脆卜卜嘅麵一齊食 , 真係好鬼夾 ga 啫 ^0^

*呢個煎麵無須用油炸，只須1湯匙多少少油就可煎出香脆效果，比起用油炸嘅徤康好多呢* ^_*

味菜牛柳絲煎麵 ~ hanhan食譜二人份

材料 :
牛     柳                500g     切幼絲
味    菜                 $5 蚊     洗淨切幼條
炒麵餅                 一個

牛柳醃料 :
黑椒碎            少許
糖                    1 1/2茶匙
豉油              半湯匙
生粉              半湯匙
麻油              半茶匙
水                   兩茶匙

獻汁 :
蠔油   一湯匙
糖         兩茶匙
生粉     一湯匙
水          半碗

做法 :
1 . 先將麵餅用水浸軟鬆開 , 然後沖一沖水再隔去所有水份備用
2 . 牛柳絲用醃料醃一小時
3 . 用易潔鑊 + 半湯匙油用中火燒熱將炒麵加入鑊中輕輕挑散成圓形

4 . 慢慢煎至乾身麵條開始脆身
5 . 然後將麵餅反轉煎另一面 ( 煎另一面時沿鑊邊加少許油淋一圈 )

6 . 將兩面麵煎至面層脆卜卜麵餅盛起上碟

7 . 燒熱半湯匙油後將牛柳絲倒入鑊中炒至7 成熟加入味菜拌勻炒至牛柳全熟盛起加上麵餅上

8 . 將獻汁拌勻落鑊兜至滾起開始杰身即可熄火 , 然後平均地淋上牛柳絲上即可

*因為味菜味濃所以醃牛柳絲時唔須要太重手, 否則會過咸呢 *

2013年10月16日星期三

"泰" 野味 ~ ^^

泰式粉絲蟹煲 ~ 做法步驟

14 - 10 - 2013 ( made )

以往每次去泰國都必去唐人街食粉絲蟹鉗煲

大大隻蟹鉗 + 上野味嘅粉絲 , 我可以一個人食哂一煲呢 ~ haha

今次喺嗰邊嘅超市掃咗一大堆醬料返嚟送比 blog 友

* 我就更係留起啲自用啦 * hehe

今晚就試吓用呢隻粉絲煲醬料整粉絲蟹煲

真係好泰國味道 , 正 !

2013年9月14日星期六

椰青糕 ~ 食譜

14 - 9 - 2013

尋晚有朋友上嚟食飯 , 所以我又整咗啲飯後甜品比大家品嚐

其實呢個甜品之前已經整過 , 不過懶筋起冇擺上嚟

朋友們食完後大讚夠清香 ~ LIKE 呀

仲即刻問我攞食譜

見橫掂要寫開食譜 send 比佢 , 所以順便 save 起 copy 埋落呢篇 blog 比大家參考

有興趣嘅 blog 友可以試吓整吖 ^_*

椰青糕 ~ 食譜 by hanhan

椰青         一個
冰糖      80g
大菜        10g (可用洋菜粉代替）
清水 + 椰青水   =1000ml

做法 :

  1 . 劈開椰青 , 將椰青水倒出留起備用 , 然後用薄匙羹將椰青肉刮起切幼絲用食用水沖一沖淨備用

  2 .椰青水+冰糖+大菜煮溶滾起後然後過篩

3 . 放至微溫後入模，然後 +入椰青絲再放涼入雪柜雪凍即可

* 我用咗呢個小工具嚟刮椰青肉 , 只要輕輕一刮就可將肉刮起 *