家務助理唔易做

2015-10-26 一傷 再傷 ～

去年因為工作太過勤力（博老細加我人工）而搞到左手受傷

經朋友介紹下去做推拿 總算好得7788！

可能左手傷過之後 怕再整傷 ，好自然地將重心交到右手上，所以右手又出玩問題了T^T

近排已經開始忍忍作痛，又其是操勞過後（一上床休息時就感覺酸痛不已，無法入睡）：（

昨日開完韓燒大會後清潔完畢已經痛楚難抵，唯有指粒止痛藥頂住先！

今日一早約了去睇骨骼專科，經醫生檢查後 話我經常拎重物 所以拉傷了手踭外側肌肉 引至發炎，要食消炎止痛藥+超聲波幫助消炎. 仲要帶上手'cool'以免我再亂用力再拉傷就手尾長！

一次診金盛惠$1100， 4日藥（專科真係好那脷啊）仲要繼續覆診呢：（

由6/11開始打呢篇文章 到今日14/12，我都要分幾次先可以完成，因為用手指打字未過一分鍾嚿大肌肉已經又開始酸痛（想繼續都難）！

好彩老細都體諒我，家務都幫忙一起做，晚飯都好少煮，只係簡中煮一兩餐簡單嘅就算. 

抖咗兩個月總算有進展，但都未完全復原，所以都要繼續減產希望抖多啲快啲冇事 就可以復工整我最愛嘅麵包 蛋糕 美食 （我好掛住你哋呀）！

熱熱鬧鬧 ～ 韓燒+火鍋

U2015-10-24

今日原本只約咗ABCD三位靚女靚仔嚟個家庭式靜雞雞'韓燒'食吓嘢談吓心^^

食物我都預備好哂！

點知突然有變 ⋯⋯! 

原來A & B被發現了預備嚟偷食～ 

最後5人晚宴變成10人歡聚樂呀 haha

由於人數突變，我個燒燒爐肯定好忙燒唔切，老細提意+多個火鍋爐分擔吓，一於韓燒+火鍋 

但我已預備好食物肯定唔夠10人食，好彩多得兩位靚仔幫手，一個去買海鮮兼洗洗切切，一位就去超市補貨，終於有足夠食物喂飽大家

為怕韓燒太熱氣 我漏夜煲了一大壺 羅漢果龍眼杞子水，今日仲煲多個 印度椰子豬腱湯比大家潤一潤

另外仲買咗紅肉火龍果+益力多 做沙冰

由於冇時間 所以只做了個簡單甜品～'櫻花水信玄餅'比大家食。

後記：今晚真係'人煙稠密'，一屋人氣+燒烤，火鍋嘅煙同氣:P，第二朝起身行出廳仲一陣燒肉味呀haha ~

Twelve cupcake 迎 萬聖節

2015-10-15

萬聖節就快又到喇，大家有冇約定朋友開番個趴地慶祝吓 癲番晚呢？

Twelve cupcake 推出咗三款Hellow ween 版 cupcake 同大家分享

而我更有幸可以優先試食呢 ～ 呵呵

今年嘅萬聖節版有南瓜頭，驚嚇獨眼 & 蜘蛛呀！

三款小蛋糕嘅造型 本人覺得三分驚嚇七分可愛呢，哈！

而南瓜造型小蛋糕更用上健康嘅南蓉，獨眼睛就係少甜版朱古力蛋糕，蜘蛛造就係cream cheese 朱古力。真係可愛又好味^^

以上三款萬聖節特別版cupcake 由本月15-31號在 twelve cupcake 各分店發售，有興嘅朋友快啲去買嚟試吓啦！

賣萌 ～ 兔仔包

2015-10-4（made)

日本人對食嘅追求真係超認真，隨了要美味 更要求賣相吸引

早前在網絡上看見網友分享了好多日本做包達人嘅超萌麵包相片

真係可愛到不得了！

近期要忍口（減肥呢）所以少咗做麵包

不過睇過呢啲'萌包'之後 真係忍不住手 我都要出手賣吓'萌'先 ～ 呵呵

先嚟一轉比較簡單嘅'萌兔'，我加咗蟹椰粒 芝士粒做餡

第二次發酵後要喺頂頭剪開做對兔仔耳，可惜手殘， 一落剪後唔夠乾淨利落 比粉糰黐住較剪 所以啲兔耳巢哂皮呀，陰公T^T

焗好後再幫佢點番啲眼仔 鼻仔 口仔 再扮靚遮吓醜，搞掂，影相留念 嘿嘿！

花膠椰子杞子煲竹絲雞（食譜）

2105-10-11(made)

秋風起 又係我煲湯嘅時候^^

我個人比較怪，夏天唔多鍾意飲湯， 只會間唔中煲啲簡單湯水嚟應酬吓我老細：目

但一到入秋就會抽起條筋 好想飲老火湯：P

由其是呢款 > 椰子煲杞子煲竹絲雞

椰子同杞子嘅香甜+埋竹絲雞嘅滋補，再加花膠 女任們飲多兩碗連保濕面膜都可以撻少兩塊呀：目

今次買椰子有着數呀，哈！

因為買大送細囉，買'椰'送子，亞姐一劈開個椰子見有仔（巧打耳哦）仲即刻同我講話我會有好運到喎:D（如果係就好囉，要勤啲去買六合彩先）$_$

花膠 椰子 杞子 煲竹絲雞 (食譜 ) by  Hanhan

材料 ：

椰 子      一個（水份留起備用）

杞 子      兩湯匙 （浸軟後去水備用）

竹絲雞   一隻 （可叫雞檔代去皮）

花 膠     幾片  （我用事先發好嘅花膠）

做法 ：

1. 先煲一大鍋水

2. 將雞沖洗去清內臟

3. 椰子肉切條後沖洗乾淨備用

4. 水滾後將 雞 ,椰子肉一同下鍋用大火滾1小時 後轉中火煲45分鐘

5. 然後加入花膠，椰子水再煲15分鐘 

6. 最後再加入埋杞子煲多15分鐘即可加鹽調味

懷舊糯米包（食譜）

3015-10-10秋風起～ 食臘味～^^

終於等到秋風到喇^0^

唔使再日日熱C辣辣

唔使再晚晚都開冷氣先瞓倒

唔使再朝朝早起身都不停打噴嚏

唔使再鼻塞到抖唔倒氣喇 yeah yeah yeah !

今日一於整籠 '臘味糯米包'嚟慶祝吓先^^

呢款舊式點心我已經想整好耐，因為而家好少酒樓會整，想食就要去一些舊式茶樓先有機會食倒，仲要等秋冬季節先會推出！

今日終於的起心肝自己整 ～ 嘿嘿！

臘味糯米包食譜：by hanhan 

先將2杯糯米浸熱水3小時，然後隔水蒸35分鐘。

將冬菇5粒，蝦米一湯匙，瑤柱一湯匙浸軟 +臘腸 潤腸各半條 切細細粒爆香。（喜歡蔥花可加入）

生抽，甜豉油 各一湯匙 + 半杯熟水+少許糖拌勻較啱合自己嘅味道後分幾次拌入蒸好糯米飯中撈至上色。

將炒好嘅臘味材料同糯米飯拌勻。

然後包上黃皮再落鑊隔水蒸8分鐘即可。

中秋節快樂！

2015-9-26

一年容易又中秋 ～

真係話咁快又到咗中秋節

我嘅例牌節目就係 齊齊回外家食飯慶中秋^^

今年除咗整月餅之外 ，今日仲整咗個甜品 》水信玄餅 》中秋版

日版就加櫻花，我呢個港版就加個月亮&大白兔

個兔又真係大到遮哂個月亮咁滯呀 哈哈 ⋯

嚟個搞笑版祝大家中秋節快樂，人月兩臀臀圓圓 ^^

亞茂整月餅 ～ II

21-9-2015 花花冰皮

今日又去買材料繼續做亞茂 ～ 整餅

 經過尋日嘅亂嚟失敗作之後 呢鋪就慢慢嚟一邊整一邊研究

我用咗香芋粉，士多啤梨粉，紅麴粉，綠茶粉，芒果粉做色料加入粉糰為圖案上色

呢批'卑鄙月餅'終於都可以見得吓人，可以拎去派街坊喇，吃吃吃吃！

第一款模 用咗'朱古力+脆脆餡'

吸完出先發覺漏咗條圍邊冇上色皮 >.<

第二款模 用咗 '芝麻栗子餡'

呢個效果都唔錯^^（自己讚自己嘅白痴）:-P

第三款模 用咗'綠豆蓉包紅豆餡'

呢款三色花花 視覺效果唔錯，嘻！

第四款模用咗 '美綠+脆脆餡'

呢個原模其實好普通，點知整好出吸效果又幾靚喎，呵呵！

第五款模 心型花用咗'紫薯栗子餡'

呢個模款式一般，做出嚟效果都係一般！

23/9 今日拎去送禮！

朋友回家後即what's app 我話 >

好一支強心針！

包呢轉冰皮唔計預備材料嘅時間，淨計整色整水包餡吸模一共做咗32個已經玩咗5個幾鐘，企到腳痛夾條腰都梗埋+_+

但朋友，家人嘅讚真係抵消哂所有嘅累

（喜歡整嘢食嘅朋友應該都有同感）*^o^*

開工 ～ 做呀茂

20-9-2015 月餅第一Run

舊年喺淘寶 見呢個三角形月餅模好特別 即刻淘咗一套，仲淘埋啲盒仔。

不過因為某些原因所以舊年冇整到月餅！

今晚中秋前一定要同佢開齋：目

尋日去買齊材料 襯老細今日返工我就可以專心博殺！

第一轉整咗脆皮奶皇月餅

真係耐冇整都忘了程序，甩甩漏漏下焗到裂哂>.<

玩完呢個 跟住又玩埋冰皮,嘻！

仲學人玩花色，但啲色較得太深 出嚟效果麻麻，又出哂界:目

唔得，我要再做好啲，明天去買料再整過 :D

King size 洋蔥牛肉包

6-9-2015 （made)

呢期要減肥 所以好耐冇整麵包

不過身邊真係太多魔鬼 太多誘惑

今日終於忍唔住要開機， 嘻！

一係唔整，一整就玩大啲，整咗個直徑'12'寸長嘅 洋蔥牛肉包 ～ 嘿嘿

我見啲粉糰仲有淨就手痕痕加咗條辮仔圍一圍，懶靚咁 呵！

但忘了叉佢幾嘢比啲窿仔佢抖氣，所以個包包唔夠脹卜卜～ 激C  XXD

咁大個包 我同老細兩個當飯食都食唔哂呀，哈哈

老細叫我以後唔好玩咁大 好惡啃，以後只準玩包仔，可以分幾餐慢慢食 :P

*星期二 去完街回家時又執倒$$^0^(我耐不耐就會執倒$$）上次仲執倒一條紅衫魚，今次就執倒50皮

即刻放上fb分享，朋友笑我 鬼節喎 夠膽喺執$$ XD

 我話唔水驚我睇清楚唔係'冥通銀行'出嘅先執架，kaka kaka ！ 

我跟手仲掉番幾個碎銀落地呢（呀媽教落話喺街執倒$$要跟手掉番啲落地立地稅，否則會行衰運架）

彩冇比食環署見倒我掉$落地，否則為咗50皮而唔見1500皮就大鑊XD*

舊屋村、新創意 ideas Dessert ~ 甜品試食

4-9-2015  blogger Event

多謝 ideas Dessert 店長 Parco 邀請，去佢哋剛剛開張一個月嘅甜品店試食。

甜品店座落在荃灣大窩口區 富麗花園商場，鄰近悅來酒店（該區嘅住客，旅客，上班 上學一族以後有好嘢食喇）。

Ideas Dessert 主打抺茶甜品，店主更特別選用 京都「山政小山圓宇治抺茶」製作一系列甜品，此抺茶香濃而不苦澀更得大眾喜愛。

而此店製作嘅雪糕是採用高品質3.6北海道牛奶，所以入口特別香濃幼滑 。

店長推介：

「宇治森林」抺茶雪糕配上紅豆，豆花，雙白玉 抺茶餅層次感豐富，大愛呢。

「招牌抺茶心太軟」暖暖嘅抺茶流心，香濃而不會太甜配埋 白玉子 紅豆 抺茶雪糕 預人幸福嘅感覺。

其抺茶tiramisu，列日窩夫，紫薯沙冰，雪山巨人等等都深受食客喜愛

此店更顧及一眾喜愛舊式甜品嘅街坊所以特製了港式 中式糖水

如 楊枝甘露，豆腐花，涼粉，芝麻糊，蛋白杏仁露，陳皮豆沙，花蓮燉雪梨等等！

真係照顧周到呢！

ideas Dessert 更推出開學優惠，只要身穿校服嘅同學仔去光顧 所有軟雪糕產品都有9折！

（我要去籠底摷番條校裙出嚟先）XXD

其實佢哋仲有另一優惠架 嘻嘻，就係去Facebook 佢哋嘅專頁接讚 再去店裡出示呢張優惠照就可享9折^_*

反沙甜薯 sweet potato (食譜）

2015-8-7

前幾日買咗一包日本甜薯食淨兩條，今日要清埋佢，否則再擺落去如果擺到又發芽 我可能又會手痕痕拎去種：目

諗起曾經食過嘅潮式反沙芋（好好味呢）

一於用蕃薯嚟做一個 hanhan 版反沙蕃薯，哈哈哈哈！

我呢個簡易版做出嚟效果都唔錯，每片甜薯都包上一層半溶砂糖，甜甜脆脆 （老細食完一嚿接一嚿）嘿嘿

舊曆七月十四日（嘩鬼）回外家食飯又整比家人做飯後甜品食（一至好評哦）（哈哈 好滿足哦）^0^

2/9 人妻火鍋聚 我又整咗比班好友佢哋試，一拎出嚟好快就掃哂～呵呵

*見大家都鍾意食我整嘅呢個甜品真係好開心 好有滿足感* 

做法一啲都唔難，真係好易做 易過整 反沙芋好多，嘻！

Sweet sweet potato 食譜 ～ hanhan

日本甜薯    2-3個（揀比較圓身大隻嘅）

砂 糖。     3大湯匙

油。         半湯匙

水。         少許

做法：

1. 先將甜薯洗淨印乾水份後連皮切薄片

2. 落半湯匙油燒熱後落蕃薯片用中火煎（要反覆煎兩面，其間洒少許水落鑊 目的讓蕃薯片受到水蒸氣會易熟透）

3. 煎至蕃薯片轉哂色後用竹簽吉一吉中心見淋淋哋就落砂糖快手兜亂（讓每片蕃薯片都沾滿半熔化砂糖

4. 見砂糖差不多全熔化後即可上碟

*襯熱食可以吃到脆糖口感*

人妻烚烚吓 ～ 火鍋聚

2015-9-2

人妻們今晚又借啲咦聚喇^^

籍口係咩？嘻嘻，忘了喇，只記得一句》》好耐冇烚烚吓喇！

襯明天小朋友唔使返學今日即刻嚟喇喂⋯⋯哈哈

靚太們各自出動去搜購美食帶到"人妻偷食俱樂部"開餐^0^

餐前嚟個小吃：sweet sweet potato

冬陰公蝦片

主餐嚟喇！

有Fian 買嘅無敵大花竹蝦，花蟹，貴妃蚌

Darling 買嘅"卡娃伊"魚蛋，丸子

Me 買嘅 靚爆鮮味牛肉&呢啲果啲，果啲呢啲⋯⋯：）

加埋包正爆芝士蕃茄湯底 真係omg ~ 減緊肥嘅我都要刮出去 食咗先算喇 haha

食吓，傾吓，講講笑笑話咁快又過咗幾粒鐘，拿拿臨拎埋個蛋糕出嚟

"芒果熱情果蛋糕" 送給Fian 補祝妳生日，希望妳like eat la ^^

新鮮樹上熟 ～ 大樹菠蘿

2015-8-4

其實我對大樹菠蘿興趣不大，記得小時候圍村內都有幾棵大樹菠蘿樹，見倒一隻隻熟透嘅大樹菠蘿跌落地都冇人吼（感覺有啲嘥）

直至2010年 我老細嘅同事比咗一盒大樹菠蘿肉我哋食 發覺有啲核已經發芽，我就手痕痕哋用一個兜仔加啲濕棉花去浸開始發芽嘅種子

只係幾日啲芽已經有幾寸長（好玩喎）

即時幾幾棵幼苗移植到花盆繼續種

不出兩星期已經長到差不多有兩尺高

（好開心，第一次成功種植）哈哈！

（我在yahoo blog 年代都有記載）

見幼苗一直成長雖然開心，但知道再繼續種在花盆唔夠佢發展 可以會發育受阻而'瓜柴' ：（

思前想後 即刻打比老媽 問佢試唔試種大樹菠蘿（反正我外家有地方夠落地種）：目 老媽答應yeah~ 第二日就帶住幾棵幼苗回外家移植落地種

經老媽悉心照顧 兩年時間小幼苗已經變成大樹了，2012年仲開花結果 出產了第一批大樹菠蘿（呀媽拎哂去派街坊）：）

呢幾年夏天 結嘅果實越來越多，上月返去點算 已經有9隻大 5隻小嘅XD

即時上載相片上fb同朋友分享

收倒嘅回應係 要 要 要 XXD

（好彩今年多產，我又可以派 嘻嘻）

老細幫我擇咗三大個比較熟啲落嚟，最大嘅兩隻每隻應該有20kg

一隻大嘅留比老媽派街坊，我記應承比隻細嘅朋女嚟煲湯，我就要隻大嘅回家再擺幾日吽多幾日再拆殼起肉分比朋友們

半隻大樹菠蘿起肉後分倒7盒

每盒都差不多有700g(好開心）

最開心嘅係 由一粒核從我手上變成一棵幼苗再經老媽嘅照顧變成收獲豐富嘅大樹，真係好有滿足感呢 ^0^