2016年2月28日 星期日

2016-2-28 芝士蟹肉焗薯蓉

前日朋友送嘅4隻麵包蟹 經老細拆骨起肉後 今晚拎嚟整咗芝士蟹肉焗薯蓉
再配埋青豆忌廉湯,燒牛肉沙律,蒜蓉麵包條,豐富的晚餐上枱喇^^



芝士蟹肉焗薯蓉:
底層係滑滑嘅忌廉薯蓉,中層係+料炒香後嘅蟹肉蟹膏,面層係混合了嘅芝士焗香 Yummy yummy  

 



2016年2月21日 星期日

2016-2-20 burgerman

今日捉咗老細去深入埗搵食
近期食得太多中菜好悶了,所以轉轉口味食漢堡包!

早前經過見呢間鋪仔細細但經常塞滿人,多事八卦地望吓 見佢係主打賣漢堡,特式漢堡包 有鵝肝漢堡,和牛漢堡,軟殻蟹漢堡 ⋯⋯⋯ 又真係幾特別喎!

今晚唔想煮飯 就乘機去會一會佢先!

老細一睇餐牌就話要試'至尊漢堡'(材料有兩塊牛肉+煙肉 芝士 蘑菇洋蔥碎 煎蛋,蕃茄 生菜)實在太豐富喇。+$18仲有薯條/薯格/沙律, 汽水!


我怕要兩個餐會太飽食唔哂 所有只要了這個 至尊漢堡+飲品 薯條
然後再+個燒雞青蘋果沙律 & 一客手指魚。
果然冇揀錯,漢堡材料超豐富 牛肉又夠juicy 同肉味,薯條又粗又多

沙律都好大兜 材料又新鮮,正!

手指魚 外層脆卜卜 內裡juicy 好味!

埋單都係$179 抵食!


2016年2月20日 星期六

2016-2-20 黑仔王

猴年一開始就已經有黑氣
大初一已經瀨嘢,真係黑到落腳趾啊(有相為証,絕無作大架)陰公!

年初七又無啦啦破財!
除此之外,跟住仲發覺(比人借意喺背後插了一刀)~_~;
真係要幾黑有幾黑
難道要我破例到鵝頸橋 去打小人嗎?=.=;
⋯⋯⋯⋯⋯⋯⋯⋯⋯⋯⋯⋯⋯
點知⋯⋯⋯
前兩日喺鞋柜裡摷襪着時 比我摷倒兩對去年買嘅襪,哈哈
呢兩對襪原本係買嚟送比朋友 玩吓 搞吓笑嘅,但因為錯過了驚蟄 沒有送出。
哈,估唔到今年竟然自己用得着(苦笑)!
即刻着住佢出街先^0^
踩 踩 踩 



2016年2月15日 星期一

2016-2-14 撈起

今日係情人節&人日,祝大家開心快樂!

今年又係例牌回娘家食飯齊慶生
為咗唔想大哥大嫂兩對手咁辛苦煮三十人飯餸,所以我哋幾姐妹都會幫手各自預備啲餸菜帶回去或返去煮 分擔吓!
我就整咗個快 靚 正 嘅'撈起',貪佢意頭好 新春食呢個一流呀。
由於手殘嘅關係,我只用咗啲簡單材料:青瓜絲,甘荀絲,玉子蛋,三文魚,雞絲,日式海藻,魚蛋,八爪魚仔,蟹柳絲,9款材料
長長久久 越撈越有 ~ yeah yeah yeah 

這個真係簡單 易整又好味,賣相仲好靚(自己讚自己嘅自大狂,哈哈)
佢哋都話明年都要繼續有喎,yeah

另外有大家姐整嘅巴東牛肉,二姐夫整嘅椒鹽三文魚頭,老媽整嘅客家炆豬肉,大嫂整嘅薑蔥炒蟹,炒蝦球,蒸石班⋯⋯⋯⋯
飯後甜品有大家姐喺新加坡買嘅 班蘭千層蛋糕 & 我整嘅啫喱橡皮糖 ^^


2016年2月14日 星期日

2016-2-13 情人節獻禮


每年到咗呢個日子 都硬係要搵啲嘢搞吓先安心
今年仲要係情人節+人日同一日
為咗想身邊嘅親友開心,所以頂硬上都要整!
早前已經淘咗啲靚靚禮盒,新年前就開始預備盒中禮(因為隻手都仲有痛 所以要分批整 比啲時間抖吓回吓氣)
盒中禮有:脆米波波

花生醬法蘭酥
蜜餞橙片朱古力
三款唔同味嘅朱古力

祝大家情人節 人日開開心心 快快樂樂!

2016年2月9日 星期二

蜜餞橙片朱古力(食譜)

1-8/2-2016 made 


早前在YouTube 睇見'日人'示範教學教整呢個蜜餞橙片朱古力,好似好好味咁 好想試吓整,但製作過程須時要8日咁耐(考慮中⋯⋯⋯⋯⋯ 都考慮咗幾個月後才動手整)≧∇≦
今日(1/2)喺九龍城xx生果店見倒啲橙細細隻又幾靚(即時想起佢)^0^
忍唔住手買咗12隻 嘻嘻!
回家後即刻開番段片一睇再睇然後用筆寫起製作過程(因為是全日文,所以我就運用看片理解法去自己篇寫翻譯食譜)(希望同日文版唔會有太大出入啦,哈哈!)
講番呢個橙片 點解要用8日咁耐 因為由洗淨 刮去橙油 慢煮 浸泡 過水再浸泡  然後切片加糖慢煮 浸泡再慢煮,為的就是要讓每一片橙片嘅皮去清橙油澀味而只留有橙嘅香甜。再到烘焗 風乾到上朱古力就完成

我用咗12隻小橙切出90片橙片浸製, 終於在8/2大年初一完成最後程序 然後包裝得靚靚 送給我的親朋好友

希望大家食過後都好似橙片咁 甜甜蜜蜜 開開心心^^


蜜餞橙片朱古力(hanhan ~ 翻譯版)

材料:
橙            12個(約手掌心大小)
砂糖。   約 900g
朱古力。300g

做法:day 1
1. 將橙沖洗後用刀輕輕刮去橙面的橙油,然後用竹簽將橙刺滿小孔
2. 將橙放入一深鍋中注滿水後浸一小時
3. 將水倒去,然後注入新水用慢火煮至滾起後煮多5分鐘
4. 將橙撈起倒去熱水,再將橙放回鍋內再注滿水用慢火煮滾後再煮多15分鐘熄火 將橙撈起用冷水浸一夜
Day2 :
今日將浸橙嘅水倒去 換入新水再浸(重覆換水3次後浸到day3)
Day 3 :
1. 將橙取出抺去水份 然後切片約 5mm厚
2. 將橙片上磅磅重量(例如橙片是1000g,砂糖份量就是900g(即砂糖份量是橙片嘅90%
3. 用一大深鍋將橙片平均鋪好 然後將砂糖倒上面層 用慢火煮至糖完全溶化後煮多10分鐘熄火(將面層的泡泡不走 )蓋上蓋浸一日一夜
Day 4 :
今日咩都唔使做 繼續浸橙
Day 5 :
用慢火煮滾後煮多30分鐘,熄火 蓋上蓋又浸一夜
Day 6 :
預備一大盒將橙片 夾起平均鋪好於盒內,然後將浸橙嘅糖水用慢火煮至開始杰身後,將糖水倒入盒內浸住橙片過夜
Day 7 :
取出橙片鋪上烤架上,焗爐預熱用150度焗13分鐘,取出鋪在隔油紙上風乾一晚
Day 8 :
1. 將朱古力用熱水坐溶
2. 將橙片殘留嘅核取走(如果有)
3. 將半邊橙片沾上朱古力放在牛油紙上 然後放雪柜冷藏至凝固。
4. 取出 入袋 完成 送禮。

*由於天氣冷又夠乾燥 嘅關係,我冇放入雪柜冷藏都好快已經風乾凝固*
右下角嘅係浸煮完橙片後淨下嘅橙糖漿,我留番起日後用作整蛋糕 甜品用^^


2016年2月6日 星期六

2016-2-6 賀年糕點 ~ 黃金奶皇糕


早前fb 爐焗群組嘅靚女主持人出咗呢個 '黃金奶皇年糕'食譜,我就更係C咁蝕底跟住整 試吓啦!
呢個年糕主要材料係咸蛋黃,奶皇,食落好似食緊奶皇包嘅餡咁 哈 又幾特別喎!
所以就大量生產 整多啲送比我嘅親友們試食


我仲用咗迷你鯉魚模大量生產,金黃嘅鯉魚,一雙一對 過年送禮真係夠哂好意頭呢^^