2009年7月26日 星期日

自家制 "生日大餐"

2009年7月26日下午10:40公開累積瀏覽 514 21

  之前為"老細" 整咗個 "生日蛋糕" 做頭盤 , 而家就輪到生日晚餐主菜出場喇 ! 
    ( 先嚟一個  : 海苔粉蒜茸包 )  
 

   ( 再嚟嘅有 :  蟹柳粟米蛋花湯 ) 
 
 
  ( 主菜有 : 特大老虎蝦拼牛扒 ) 
 

(  跟住嘅係 : 火雞肉粒拌菜絲沙律 ) 




   ( 呢對 "老虎蝦 "真係好大隻架 , 長過一把間呎 , 真係一人一隻都飽咗一半 )
      

七彩湯丸明列子涼粉

2009年7月26日下午11:59公開累積瀏覽 323 19

再嚟一個飯後甜品 , 七彩湯丸明列子涼粉 , 材料有呢個 Darling 送我嘅明列子   七彩水果味湯丸同涼粉 , 加埋一齊係咪好靚好吸引呢 .  " 老細 "我為你做嘅生日大餐有咁多嘢食算唔話得喇掛 .
  

2009年7月23日 星期四

合掌瓜炒牛肉"碎"

2009年7月23日下午9:39公開累積瀏覽 218 12

 原本我係要整合掌瓜炒牛肉 , 點知個"牛肉佬"掛住講嘢就將嚿"牛肉"切到變咗"牛肉碎"咁滯 , 真係俾佢激 C .





食譜 ~

   合掌瓜去皮去芯切片汆一汆水 , 牛肉用生抽 , 糖 , 生粉調味 .
   先炒熟牛肉再加入合掌瓜片兜亂即可上碟 .

2009年7月22日 星期三

大樹菠蘿成長篇

2009年7月22日下午3:55公開累積瀏覽 156 11

估唔到短短兩個星期內呢個 "大樹菠蘿"由我口中吐出嘅核已經發芽生根長葉 , 而家已經可以落盆分開種 , 我諗不出一個月一定會有兩呎高  , 睇住佢哋成長得咁快真係好開心 .
  

  

  

 



2009年7月15日 星期三

牛柳炒素豆腐

2009年7月15日下午9:50公開累積瀏覽 233 23

簡簡單單嘅一個餸 , 只須牛柳一件 , 加一盒素豆腐就搞掂 .

2009年7月13日 星期一

包雲吞

2009年7月13日下午9:15公開累積瀏覽 201 58

  又係好耐都冇包過嘅雲吞 , 都係"老細"提意至記得呢樣嘢 , 不過今次有啲改變 , 改咗用廣東雲吞皮去整 , 因為呢隻皮薄啲又有蛋香 , 冇上海雲吞皮咁厚 , 唔會食幾隻就撐爆胃 .   

   

   呢個餡用咗椰菜 , 紹菜 , 免治豬肉 , 仲加咗芝麻 , 食落有芝麻香 . 正 ! 
   

  呢盆係我包嘅 !
  

  呢盆咩花款都有嘅就梗係我"老細"嘅傑作啦 !
   

2009年7月12日 星期日

赤柱 西多士

2009年7月12日下午3:15公開累積瀏覽 1057 10

 3 點 3 "法蘭西多士下午茶 " .
呢個"西多士"係非一般做法 , 我係用咗"赤柱"式"西多"做法去整 , 何解叫"赤柱"式呢 ?如果去過"赤柱"而又食過呢個"西多士"嘅人就會知道 , 食落嘅口感比較鬆 , 軟綿綿 . 真係好食過普通版嘅"西多士". 

   

啤酒焗 "豬手" ~ (有影片教學 )

2009年7月12日下午9:10公開累積瀏覽 1858 40

冰格仲有隻 "咸豬手" 放咗喺度都成個月 , 係時侯整咗佢嚟食 , 但係點整好呢 ???  走去問"老細" 想點食 , 佢就提意整"啤酒焗豬手" .   嘩 !   呢件嘢要今日浸 , 聽日又要炆又要焗至有得食喎  .  不過"老細"話要食唔通我會唔整咩 .



   24小時後嘅成果 .

   
 
拆骨起肉後上碟 . 淡淡嘅酒香加上蜜糖嘅香味 , 一句講哂 , 正 !

2009年7月11日 星期六

豉油皇香蔥炒蝦

2009年7月11日下午11:00公開累積瀏覽 214 9

  呢個餸係"老細"今日指定要有嘅 .    ( 點呀 ? 滿意嘛  ) 

  

2009年7月7日 星期二

紅肉火龍果沙冰

2009年7月7日下午4:50公開累積瀏覽 234 11

"吉隆坡"特飲 , 點解我會咁講 , 係因為我去 "吉隆坡" 旅遊時發覺好多食店都有呢個飲 , 可能嗰邊日日都咁熱 , 所以我差唔多晚晚都會飲一杯 , 一杯落口真係乜暑都消哂 , 最重要係火龍果有美顏通便呢個功效 , 真係日日有得飲 , 好過妳搽護膚品 .
不過香港好少有紅肉火龍果賣 , 多數得白肉 , 我試過用白肉整 , 不過唔知點解整出嚟唔好飲 , 簡直係兩回事 , 所以今日見倒街市有得賣 , 拿拿聲買咗幾個返屋企即刻攪嚟飲 , 嘩 ! 正呀 .
   

  紅肉火龍果加冰用攪拌器打勻 . ok . 

小暑 , 消暑

2009年7月7日下午9:25公開累積瀏覽 102 8

今日喺街市行過什貨鋪俾 '亞姐"叫住 : "靚女" , 今日小暑呀 , 買番包"冬瓜湯料"煲湯消吓暑啦 ! 我話今日咁熱仲煲湯飲 , 我怕未飲完一碗已經中暑囉 , 佢就話唔煲湯用嚟煲水飲都一樣架 , 雪凍飲仲正 , 咦 , 呢個提意唔錯喎 ! 就幫襯佢買咗包返屋企煲 .  
   材料做法簡單 , 只需要冬瓜湯料一包 , 糖冬瓜一包 , 材料過水沖一沖 , 將所有材料放入一大煲水 , 水滾後再煲45分鐘熜火 , 喜歡凍飲嘅可放入雪柜雪凍 .
   唔鐘意甜嘅飲法可將湯料加瘦肉煲就變成湯水 .
  


2009年7月5日 星期日

蜜汁焗釀雞翼

2009年7月5日下午11:55公開累積瀏覽 1812 19

  蜜汁焗釀雞翼 (食譜 )
見"老細"7月3 號放咗我一日假去"威"唔使煮飯

今日就報答吓佢 , 整咗佢最想食嘅 "釀雞翼 "啦 !  
   


         蜜汁焗釀雞翼 ~  (食譜 )
    材料 :

      雞中翼連尖 ,  馬蹄 , 冬菇 . 蜜糖 , 醬油 .  ( 我用咗瑞士汁 )
    做法 : 

    1. 將雞中翼用較剪起出中間兩條骨同肉只淨皮 . 雞肉留起備用 .
    2.  留起嘅雞肉跟馬蹄 , 冬菇切碎粒用生抽 , 糖 ,生粉少許醃一陣然後塞入雞翼中至滿 , 再用牙籤串好封口 .
    3.  將串好嘅雞翼放入醬油中上色 .
    4. 將上好色嘅雞翼放入已掃上油嘅焗盆中
    5. 焗爐預熱用180度焗15分鐘 , 取出掃上蜜糖再入爐焗 5 鐘 至金黃色即可

   

2009年7月2日 星期四

珍珠涼粉芒果凍 ~

2009年7月2日下午1:00公開累積瀏覽 324 28





  

  材料 : 涼粉粒粒 , 珍珠 , 芒果凍粒(上次整流心芒果布甸用淨嘅), 糖水 , 椰漿 .