招呼唔到 ~
大姑奶兩公婆前幾日專登飛返嚟香港為咗星期日 跑馬拉松 籌款
做細佬嘅( 我老細 ) 就金錢贊助 , 做弟婦 嘅我 就一於整餐好嘢食幫妳哋打打氣啦 
搬咗嚟呢度都係第一次招呼我 "老細" 嘅 親戚 
佢哋真係好賞面 , 一呼百應 
為怕失禮我 "老細 " 所以之前兩晚已經攪盡腦汁 開始諗要整啲咩好嘢嚟招呼佢哋好呢 
因為出席嘅有佢 > 亞媽 ( 我奶奶 ) ,家姐 姐夫，亞哥 亞嫂 姪仔 , 細妹 , 外婆 , 二舅父舅母 , 亞姨 姨丈 表妹 & 男友 .
( 加埋我 同 老細 一共 15 個大人 一個 BB ) 
從未試過一個人煮咁多人嘅飯餸 , 真係諗到頭都爆
( 通常超過十人以上嚟我屋企 , 都係例必 十十吓 , 快靚正吖嘛 )
不過因為有人唔食牛 , 所以唔可以 烚 
最後同 老細商量過後 決定整呢啲啦
炆鮑魚
醉雞一大隻
日式燒汁煎帶子
炸墨魚丸 配 他他汁
威靈頓牛肉餡餅
因為有人唔食牛 , 所以整多個"黑豚豬 " 嘅餡餅
粟米雞球
XO 醬 蜜豆粟米仔炒蝦仁
鹽焗烏頭
XO 醬炒豆苗
豆豉鯪魚炒油麥菜
加埋個南瓜茸湯 , 開飯 LU ) ) ) ) )
我諗住整咗咁多個餸應該都夠食架啦 , 仲煮咗 5 大杯米 , 點知都俾佢哋掃清哂 
真係低估咗佢哋嘅食力 Tim 
好彩之前一晚我已經整定啲蛋糕 , 甜品 , 小食 .
冇飽飯食 就 食埋甜品 補番數啦
我整咗 益力多乳酪芝士蛋糕 , 特濃朱古力 mousse 杯
因為 "老細" 好粗暴咁幫我甩模 , 搞到個 cake 好醜樣 
好有創意嘅 舅母 就幫我加咗 "豬" 古力 上去 點綴吓順便遮醜 
好彩佢哋都掃清哂 
小食 , 麥米糍 , 食淨三粒 ~ 多謝讚面
老細 開咗 三支 私人珍藏 嘅 紅酒 嚟招呼親友 ( 仲撻咗我支 "林檎" )
今日真係酒微菜薄 招呼唔到 失禮哂
仲有 多謝 舅母 , 亞姨 , 大姑奶 嘅禮物
多 謝 妳 哋 咁賞面 嚟食咗餐冇餸飯
特別 鳴謝 我 "老細 " 今日 幫我洗鮑魚 , 斬雞 , 同埋炒咗兩碟菜 ( 加你三分喇 ) 
今日真係整餐 c , 洗餐 c , 好 好 好 攰呀 
但當我聽到妳哋個個都讚 啲食物整得好味
真係好開心 , 得到妳哋嘅讚賞真係咩都抵番哂
( 最後 希望 大姑奶 佢哋可以輕輕鬆鬆跑畢全程 , 籌倒多啲錢 )
沒有留言:
張貼留言