曾相處多年 心難免會難過 不捨
與妳嘅一點一滴，一生難忘
我會如妳願繼續活得開心 精彩 快樂
一路好走 願他日可以天上重聚
2015年4月4日 星期六
消暑去濕飲品 ～ 薏米檸檬蜜
2015-3-28
近期天氣濕濕又悶熱，瞓醒起身都感覺仲好攰 好似冇瞓過咁（懶就懶啦）
係時候煲番啲去濕飲品清清體內嘅濕氣
今日煲呢個薏米檸檬蜜，因為齋薏米水老細唔多好
所以我會加入檸檬 蜜糖拌飲（氹細路手法）氹老細飲:P
薏米檸檬蜜 ～ by hanhan ^^
生薏米 110g
熟薏米 65g
洋薏米 60g
水 4公升
檸檬汁
片糖 （我用蜜糖）
將所有材料洗淨，煲滾水後落薏米煲一小時。
放涼後加入檸檬汁 蜜糖拌勻雪凍飲 可消暑解渴 利尿去水腫 可以減肥又美白呢😉
可將三種薏米量好份量再分好一份份個別包好 每次用就方便得多。
*我喜歡一次買幾個檸檬洗淨切片然後
倒入蜜糖放雪柜浸一星期，就隨時可以拎幾片檸檬加+幾羹檸檬蜜沖水飲*
2015年3月29日 星期日
新玩意 ～ Philips 健康豆漿濃湯機
哈哈 有幸做咗 飛利浦 健康豆漿濃湯機 大使
收倒呢部新產品（係我至愛嘅紫色呀）^^
呢部豆漿濃湯機 外形如一部小型電熱水壺，細細部好慳地方放置 適合2-4人家庭。
機仔雖然細細 但功能都有5個架！
分別係製作豆漿，做米糊，濃湯，粒粒湯，果汁。（仲可以製作糖水呢）
最正嘅就係只要將所有材料放入後加水開動直至制作完畢後發出嗶嗶聲响就搞掂食得，唔再好似用明火煲咁要睇火慢慢煮，以後煲湯 煲糖水 豆漿 話咁快就有得食真係超方便呢^^
我好快就會用呢部機製作多啲美食同大家分享 ^-*
2015年3月24日 星期二
摺摺摺 ～ 一口波波蛋糕
2015-3-24
最近 '飛碌' 群組分享了一段Ytube 摺紙做蛋糕
係介紹兒時玩意，摺一個紙波波 然後將蛋糕麵糊注入再焗，拆開便成了一粒骰子般一口小蛋糕
貪玩嘅我覺得好有趣所以死跟 ～ 哈哈
因為片中食譜是日文，有部分材料睇唔明，所以我用回自己做蛋糕的食譜去做（一樣啫，只要食得就ok啦）^^
而摺紙波波要先吹脹後先可以將麵糊注入（吹哂啲口水口氣入去喇）哈哈！
所以食過這蛋糕嘅人要聽哂我話喇！
*唔水驚，我只比我老細食咋*
等我搵倒一個揼可以代替我個肉咀揼脹啲紙波波後就會整比大家食喇：目
2015年3月16日 星期一
2015年1月28日 星期三
HapPy BirthDay To me ~ ^0^
感謝老細給我所有
願我年年月月都有你們給我愛與祝福！
這個蛋糕是老細今日專登去買
（某次提過這蛋糕很美，想試）
原來你都有記住 ～呵呵
2015年1月17日 星期六
Happy January 食在school food
2015-01-15
今晚人妻又約埋去偷食^^
近期愛上'學校食物'所以孖佢哋又嚟食過。
真係人多好辦事，食物款式都可以點多幾款～ 呵呵
我哋要咗個三色卷壽司，有齊三款熱賣嘅壽司卷 唔使每款叫一碟咁多， 正！
卡邦尼炒年糕
今次都係要冇辣版，因為有個小妹妹唔食辣呢，呢個醬汁夠香濃 非一般罐頭湯可比美
媽咪沙律
即係沙律菜加即食媽咪麵碎上，簡單，自己都可以整倒！
冬日戀物拼盤
有烤雞，炸蠔同炸野菜 . 呢個一般，
牛助骨飯拌薯角
韓式牛肉偏甜，個飯係脆底因為係鐵板上 唔錯。
熱情香芒艾菲
人多叫一jai 飲品抵過散叫，所以小妹妹點了這個，味道ok
呢間食店食物夠特別 適合喜歡試新嘢貪過癮嘅人（我），但差在要限時前（75分）交枱。
最後要多謝請食飯嘅darling <3 <3
2015年1月15日 星期四
Tea time ～ 蘑菇芝士醬梳打餅
2015-01-14
上星期吉豬超市減價見倒有機啡菇只售$15皮一盒（抵喎），即掃兩盒！
早前朋友幫我買咗幾盒減價嘅cream chesse 因為手痛夾懶筋起 幾盒芝士一直好寂寞咁呢喺雪柜嘅一角等候我呼喚！
你哋終於可以出場喇 yeah ~
兩盒蘑菇+兩盒忌廉芝士做了兩大兩少樽醬。
一放上FB 分享即引嚟為食貓一群（搞到唔夠分，第二日要再買蘑菇再整送比佢哋）^^
咁好味嘅醬我當然會留起一樽比自己慢慢嘆啦～呵呵
今日我嘅tea 就係蘑菇芝士醬配梳打餅+特濃熱朱古力 ～ so good ^0^
Thx Datling 嘅自家製蘑菇芝士醬食譜 <3
2015年1月12日 星期一
補補 ～ 花膠木瓜燉鮮奶（食譜）
2015-01-11
喺籠底摷咗三隻大花膠筒出嚟預備KO佢
浸咗兩日水 尋晚用薑蔥出埋水發透後就將佢哋剪開幾份 然後再用保鮮紙pack好放入冰格隨時可以拎一份出來食用
今晚我已經忍唔住拎咗一小份嚟燉咗個好滋補嘅"花膠木瓜燉鮮奶"喇 哈哈！
順便用吓個新玩具^0^
花膠木瓜燉鮮奶（一人份）hanhan
材料：
花膠 50-80g（要先發好）
木瓜 100g（去皮去核切小件）
鮮奶 236ml (小盒裝一盒）
做法：
將所有材料放入燉盅內 隔水用文火燉1小時即可。
*喜歡甜啲可以加入冰糖同燉*
2015年1月7日 星期三
老翻 摩C漢堡飯 （食譜）^0^
2015-01-06
呢個漢堡飯好早期已經想整，因為人懶所以一拖再拖 拖到忘掉了！
直到前兩日喺 '豬豬島'超市發現有 西班牙橡果豬肉片 賣 即時想起呢個漢堡飯，靈機一觸 '叮' ～ 呵呵
今晚就用嚟做這個漢堡飯喇 ^0^
呢隻 橡果豬肉片 雖然肥肉多咗啲 但肉味夠 又唔韌 幾好 幾好！
漢堡飯 食譜 hanhan
材料 ：
珍珠米 一杯（煲熟）
橡果豬肉片 半包
洋 蔥 一個 （切幼條）
蛋黃醬
豬肉醃料：鹽粷 一湯匙
炒洋蔥用料：日式醬油，味琳
做法：
1. 先用鹽粷將豬肉片醃1小時以上
2. 將煮好嘅飯分成6份搓實再壓成圓餅形
3. 燒熱少許油落洋蔥加醬油，味琳炒至開始軟身
4. 落豬肉片一起炒至熟透後盛起
5. 易潔鑊用炒許油燒熱後將米飯餅放入煎至兩面少許脆身即可盛起上碟
6. 上碟後放上炒好嘅豬肉洋蔥加上蛋黃醬做成漢堡形即可
2015年1月1日 星期四
人妻歡聚迎新年
2014-12-30
Happy new year
祝各位blog友仔 新嘅一年身體健康 食極唔肥 煮意多多 ！
今日約了一班人妻俱樂部嘅blog友齊齊偷食迎新年 ～ 呵呵
各位人妻都各自預備美食美酒帶來俱樂部開party(帶埋小朋友）
有darling 從泰國空運回來嘅泰式海南雞+雞雜，紅酒與手信
Fian 從日本空運回來嘅和菓子 與鮮果沙律，海膽醬與手信
May may 嘅千層芒果蛋糕
Miu 嘅 梅酒，迷你小麵包 與禮物
師奶仔嘅台灣名牌鴨舌，燒賣
鬼妹 嘅honey 自家做咖哩豬肉拼薄餅，白咖哩配雞蛋，荔枝酒
我整嘅雞球飯 與broken glass jello
另加預早訂嘅三文魚刺身 海膽 配紫菜
我哋由6點多開始party 大家邊食邊飲 傾傾講講 笑笑 玩到差不多11點才散band 。
感恩， 我們可以聚常常在一起閒話家常 談天說地 分享快樂 美食，願以後嘅年年月月繼續我們啲人妻偷食聚會^^
2014年12月28日 星期日
與好友去嘆茶
我哋相約到'102天龍軒'high個中式tea^^
早一日打電話去book 枱時侍應告知當日booking已經ful哂l冇枱喎！
好彩朋友人面廣 打了一個電話就搞掂！
當日去到侍應好有禮貌地引領我哋到窗前的海景枱（可惜當日天色灰白，景觀一般）
首先我哋各自點茶，朋友點了香片，我點了玫瑰花花茶（喜愛佢嘅花茶香而不濃，朋友試過後都讚好最後連自己壺香片都放棄要飲我壺花茶haha )^^
選擇點心時由於我哋胃口細 但樣樣都想試 所以最後點了 》
西班牙黑豚肉叉燒 （每人兩件）
雖然蜜味重了些 但肉質軟淋 好味
龍蝦燒賣 （各一件）
龍蝦肉夠彈牙 唔錯
燒鵝鮑魚酥（各一件）
撻皮酥香 鮑魚軟淋 味道唔錯
貴妃蚌腸粉（各一件）
侍應介紹話呢個貴妃蚌唔錯 起初都怕佢會腥所以只點了一少件 食落肉質唔腥仲幾鮮味，正！
Xx粉果 （各一件）
忘了全名，味道可以啦
雪影叉燒包（各一個）
面層酥皮夠酥鬆又唔會油淋淋 好味
叉燒腸粉 （一碟）
叉燒唔使講 good ar 但腸粉皮口感可以但欠了點米香
上湯豆苗（一碟）
豆苗夠嫩 唔錯
椰皇花膠燉雞（兩盅）
湯味香濃 花膠雖不算太大塊但都算厚
甜品有》
桂花糕，流心煎堆仔，楊枝甘露（兩份）
流沙煎堆 楊枝甘露比起 桂花糕做得出色好味
食飽飽後同好友繼續坐着喝茶談心 坐到差不多4:30先埋單分道揚鑣 .
Happy Boxing Day
Yeah yeah yeah ～ 今日終於可以同老細撐枱腳喇
今年嘅平安夜因為某個原因加上老細要返工所以取消了預定節目。而聖誕日剛好大姑奶一家從英國回來渡假所以一家人約埋飯聚。
今日拆禮物日終於我兩可以靜靜哋撐吓枱腳食大餐 然後一齊拆禮物^0^
食完晏即刻去買材料回家預備晚餐！
原本諗好買長腳蟹做主菜，可惜去到只淨番幾梳瘦弱殘腳T^T
唯有放棄！
最後買了一些次選就即刻回家開工
由於時間嘅關係 只係煲了個簡單又快趣嘅湯^^
起菜 ～
Boxing Day 套餐有 >
葡萄酒
忌廉南瓜湯
茜蘭花芝士松露醬焗闊條意
主菜》鹿肉 配 牛油煎龍蝦、帶子、酥皮薯蓉卷
甜品》broken glass jello
食完豐富晚餐後 再清理現場完畢就開始拆禮物囉 ～ hohohoho
多謝所有朋友 blog 友 家人 送給我們的禮物 聖誕咭與祝福 thx so much much much much ^0^
2014年12月25日 星期四
2014年12月8日 星期一
椰子 杞子 竹絲雞煲栗子 (食譜 )
天氣開始凍 我的湯水部又要運作喇！
整整一個夏天都冇乜煲過湯（熱到冇意慾飲湯）
但天氣一涼我就會有想飲湯嘅慾望
尋晚突然諗起了這個湯
嘩，好想飲呀!
今日即去街市買齊材料整番煲靚飲吓先
以往我只用竹絲雞 椰子 杞子 呢三樣材料去煲 , 今次加埋栗子去煲 整煲湯都特別甜潤 ^^
椰子 杞子 竹絲雞煲栗子 (食譜 ) by Hanhan
材料 ：
椰 子 一個（水份留起備用）
杞 子 兩湯匙 （浸軟後去水備用）
竹絲雞 一隻 （可叫雞檔代去皮）
栗 子 半 斤（用熱水烚3分鐘然後去衣）
做法 ：
1. 先煲一大鍋水
2. 將雞沖洗去清內臟
3. 椰子肉切條後沖洗乾淨備用
4. 水滾後將 雞 ,椰子肉, 栗子 一同下鍋用大火滾1小時 後轉中火煲45分鐘
。然後加入椰子水再煲15分鐘 之
後再加入埋杞子煲多15分鐘即可加鹽調味
2014年12月5日 星期五
結婚N年紀念日
原本想一早出發去遊新界夜晚再搵食慶祝
可惜天公不造美，整天下雨 又凍喎！
搞到冇哂mood ><
晏晝只係喺屋企附近飲茶
黃昏先再出去又一城行街 買蛋糕 食晚飯
Dinner ~ School food
想試呢間好耐 見佢最近在又一城開了分店（正，近我家）所以拖老細來些吓^^
今天只係閒日但我哋都等咗成粒鐘先有位=.=；
用餐時限只有75分鐘 坐低後即刻點菜（其實心中已經有想點嘅菜）呵呵～
烏卒卒（墨汁墨魚壽司）
飯卷內嘅墨魚甜而不韌，好味
紅葉花卷
用紅頭菜將飯染紅包着蟹柳肉
卡邦尼年糕
西韓混合而成嘅年糕 感覺特別 但醬汁比較漏
牛肉餡餅
薄餅包上帶少甜嘅牛肉碎 仍然食得出牛肉嘅香味 正
細份量炸雞
炸粉厚了少少 但雞肉夠嫩滑 唔錯
原本想試試佢哋嘅特飲 可惜老細想飲酒 所以沒有試（留番下次再次）hehe
食飽飽都已經接近十點 埋單後去了simplylife 拎蛋糕
今日行勻成個商場都買唔倒心中想要嘅蛋糕
（我想買一個細細哋蛋糕，但所有蛋糕店只淨番'8'以上嘅大蛋糕）
最後上了simplylife 一眼就看見這個鋪滿花花好漂亮嘅蛋糕 即買^0^
蛋糕外表漂亮 內裡層次分明 食落有淡淡嘅玫瑰花香 好清 好味 ^^
訂閱：
文章 (Atom)