優先試食 Twelve Cupcakes 中秋節系列

2015-7-29

多謝Twelve cupcakes Marketing Alice cheung 邀請 可以優先試食 今年推出嘅六款  中秋系列cupcakes！

有紅莓朱古力，伯爵茶雲呢嗱，特濃咖啡朱古力，綠茶朱古力，士多啤梨雲呢嗱，與及新口味 柚子雲呢嗱。

造型可愛又好味^^

現於2015年8月1日至31日期間預訂，即可享有8折優惠！

大家可以預早訂購同親友們在中秋節享用美味又可愛嘅 cupcake mooncake 喇*^_^*

人妻懷舊美食會

2015-7-20

早前人妻們在群組傾開兒時嘅小食

大家如數家珍一樣，邊數邊回味

所以索性來個懷舊美食會

人妻們除了四出搜尋兒時零食 與 玩意

更分工合作地炮製懷舊美食

看着眼前嘅食物 大家又再回憶起童年往事 ，邊吃 邊說 邊回味！

這一夜大家真係傾講得好開心^^

先嚟一張懷舊零食大合照，大家有冇食過呢？

呢張又有冇人玩過？知唔知係乜嚟^^

Darling 珍藏，懷舊搪瓷兜兜

哂完零食，玩意，到哂主食喇！

有fian 整嘅九仔粉

大菜蛋

Darling整嘅 豉油皇粉麵

師奶仔整嘅香煎蝦米腸粉兩吃

Miu 整嘅 豬皮 魚蛋 魷魚

Coki 整嘅滷水雞翼 滷蛋

我整嘅 碗仔翅

啫喱糖

潮州粉果

鬼妹 紅紅 嘅排骨飯

Darling 帶來海鹽蛋糕，順道替coki 慶祝生日

慧淇BB 生日飯聚

2015-6-13

今日係老細個姪女 1歲生日喇

祝慧淇生日快樂，身體健康，聰明伶俐 人見人愛^^

因為大伯係半素食人士 所以慧淇生日飯就揀咗去太子道 大自然素食

呢間素間素食館之前都嚟過幾次，食物款式雖然唔多 但味道唔錯，價錢又實惠 

所以晚飯時間都幾旺場 須要預早訂枱。

無敵lunch在風月

2915-6-11

今日同咗好耐冇見嘅 blog 友仔 無敵 嚟個午餐聚會

因為老板娘忘於事業，我又忘於⋯⋯⋯唔知忘乜:P，好幾次都夾唔倒時間聚吓！

眨眨眼原來已經差不多有兩年冇見喇，今日終於可以聚吓 一定要傾番夠本^0^

無敵 話想試呢間 當然冇問題啦。

不過今日個場好爆 要迫住坐窗邊類似吧枱位（熱爆）-_-#加上今個星期lunch menu 款式質數都只係一般，所以食得唔多 但傾番夠本^^

難得妳過嚟所以呢餐我嘅 唔水爭，我哋仲嚟個交換禮物，多謝妳嘅伴手禮<3

季節限定甜品

2015-6-5

夏天又到了， 又係我發癲整甜品嘅時候喇！哈哈

上星期去朋友間salon 整頭髮，朋友送我一大堆靚芒果&自家養蜂蜜糖，啱哂^0^

回家後即刻開工發癲 一口氣整咗三個 '芒果大菜糕'做回禮^^

3/6 

今日又發癲，整咗兩款芒果甜品 ～ 哈哈哈哈

有芒果河粉&芒果腸粉

不過啲河粉整得厚咗少少 有啲似金邊粉添，嘻嘻！

5/6

今日再發癲 ～ 呵呵呵呵

整咗 Mango Float 

呢個嘅材料同木糠布丁差不多，只係將餅碎轉做餅乾，完成後放冰格雪硬，到食時口感有啲似雪糕架！嘻⋯

速食慶生午聚 ～ tea wood

205-06-02

Blog 友兼好友 米芝蘭 生日在即當然要同佢食餐飯慶祝吓啦！

不過呢位全職媽媽實在太忙，要接送BB返學放學 去課外學習 買餸煮飯 打理家務 

就算佢有三頭六臂都唔夠用，有埋分身術+每天係48小時就差不多：P

所以佢只可偷少少空檔跟我來個速食短聚慶生

靚媽 揀咗去 tea wood (茶木）

荃灣 綠楊 新開呢間茶木 閒時都多人等位（可能新開業多人想試新嘢）

我哋都等咗30分鐘以上先有枱

餐牌上食物款式唔算多，所以我們點選

了一碗牛肉麵 一客肉燥飯拼豬扒 生果茶 &珍珠奶茶

牛肉麵嘅牛腱夠味夠淋唔錯 不過啲紅蘿蔔燉得未夠淋 

肉燥飯嘅份量都唔細，肉燥瘦肉多肥肉少，唔似台灣食倒嘅咁肥膩，豬扒炸得酥脆肉質唔嚡，good

果花都ok 不過個樽口就窄咗啲好難'不'啲生果嚟食

珍珠奶茶 朋友覺得唔錯同台灣飲嘅差不多

原本諗住食完主餐後叫一客甜品'些牙'食，不過已經太飽食唔落喇（唔爭氣)我哋傾多一陣見門外又堆了好多人等位 所以都唔好意思阻住個位就埋單～ 閃

呢餐晏實在唔似樣（我意思係生日飯應該食好啲嘛）所以迫令朋友下次再去食多餐補數^0^

衰鬼，喺度再次講聲 祝妳生日快樂 身體健康 小米越大越精靈聰明 老公搵多多多錢比妳哋洗^^

Philips 豆漿濃湯機 第五機 ～ 西瓜梳打特飲

2015-5-30

熱C人喇 熱C人喇 

而家先至係5月已經令人熱到透不過氣 >.<;

好彩時令生果都相繼出籠，可以買來做甜品 飲品助我消暑解熱

尋日係 MP 超市比我見倒 馬拉西瓜 紅卜卜起哂沙 好鬼吸引 ^0^ 忍唔住買咗半隻～ 嘻嘻！

回家後即刻將西瓜解剖切粒粒預備雪凍食時， 突然鬼煮意又嚟喇 哈哈！

諗倒西瓜汁呢樣飲品 ～ 嘿

我將雪凍嘅西瓜粒+ 梳打水+薄荷酒用 「豆漿濃湯機」 打成 夏日特飲 ^0^

香甜嘅西瓜汁+上有汽嘅梳打水 再+埋少許薄荷酒 一杯消暑特飲就這樣誕生了～ yeah

夏日西瓜特飲 ～ by Hanhan

材料：

西瓜肉   400g(切細粒雪凍）

梳打水   一罐（雪凍）

薄荷酒   3g

做法：

1. 將雪凍嘅西瓜肉粒，梳打水，薄荷酒一拼倒入「豆漿濃湯機」內蓋上蓋後按 Fruit/veggie drink(果汁/蔬菜汁）功能。

聽到咇咇聲響後表示製作完成，倒出即可飲用。

聚舊

2015-5-27
今日約咗兩位舊同事好朋友午聚
其中一位仲係我嘅好伴娘，自從大家婚後 又各自轉了工作與及生了小朋友（佢）各有各忙已經少了聯絡，難得十年後再重聚，細數當年嘅舊人舊事與今日大家嘅經歷真係有開心又有傷感呢～
今日我哋已經約定好要keep in touch 唔可以再失去聯絡啊。
第一聚我揀咗去 風月堂 食晏，好耐冇幫襯了，記得佢哋嘅set lunch 唔錯加上坐得舒服聚餐一流
上 開飯搜尋一下先知原來只cut 淨兩間分店，一間在佐敦，另一間在旺角，新址在旺角中心對面。
我哋約咗12點 但習慣會早少少到去攞位先（好彩有呢個習慣）因為我坐低冇耐已經全店滿座了。

到齊人後各自點餐，佢哋嘅set lunch 都有6-7款，包餐湯/沙律，主菜一款，飲品+甜品，價錢由$78-108 ，好抵食呢！
我哋三個都走湯點了帶子沙律菜

我跟J 點了燒雞扒拼大蝦腸仔配薯菜，朋友T 就揀了烤豬鞍配薯菜

餐飲選了凍咖啡 熱檸茶，賓治，甜品係雪糕窩夫

我哋邊食邊談舊人舊事 不知不覺原來已傾到4點（下茶時候都過了）哈哈！
如果得唔係有下場飯聚 可以會再傾到食埋晚飯呀:-D
尋散band前已經講好要約埋其他舊同事來一場大聚會
好期望啊，希望攪得成快啲見番妳哋！

敗家婦又去放血

2015-5-22

上星期五 sogo 減價戰開始day 1，剛好要過海所以順便去 濕平，由9樓順住落層層行層層睇，最終只得老細有收穫，買咗幾件衫同添番啲內衣褲，我就只喺超市入咗啲食嘅！

尋日又輪到 YaTa 開戰，我又唔抵得哋去咗mikiki果間放血，雖然呢間只得超市 但減價貨品多過 sogo 好多又平，所以放多咗血呢～ 哈哈！

晚餐有戰利品嘅蟹腳趾，大蝦刺身，牛乾菌焗飯^0^

今日一早又收到朋友報料話荃灣YaTa 人潮唔多仲有好多靚靚喼，叫我速到。

(因為朋友知我想買喼，而佢又係剛買了個Q爆熊本熊靚喼）

即刻趕老細飛車孖我入去睇^0^

入到去第一時間蕩個圈睇睇睇

今次有好多新喼 款式都好可愛 攪到我又出現選擇困難症（≧∇≦）

睇呀 揀，揀呀 睇，心大心細 真係唔知買邊隻好 ⋯⋯⋯ 如是者來來回回揀呀揀

老細都頂我唔順要出手幫我做決定:-P

最終買了呢款熊本熊嘅～呵呵

因為老細話》去親旅行個喼都係佢拎 所以要揀隻冇咁低B嘅喎！ -_-#

Philips 豆漿濃湯機 ～ 第一機 簡簡單單又好味 》 黑芝麻豆漿！

Philips 豆漿濃湯機 ～ 第一機 食譜《簡簡單單又好味 》 黑芝麻豆漿！




只要預備好材料放入機內開動約30分鐘就可以享受到美味豆漿喇👍
黑芝麻豆漿～ hanhan 食譜
材料：⋯⋯
黑豆 180g
黑芝麻 25g
冰糖 25-30g
水

做法：
1. 先將豆黑洗淨用清水浸9小時以上
2. 黑芝麻用白鑊炒香
3. 將以上兩樣材料放入'豆漿濃湯機'內再將水注入至Max與Min之間 蓋上蓋鎖好後按 Soymilk(豆漿)功能
4. 打好豆漿後襯熱將冰糖加入拌至溶化
5. 用篩隔去豆渣後即可飲用。

Philips 豆漿濃湯機 ～ 食譜 第二機 》蟹肉南瓜忌廉湯

Philips 豆漿濃湯機 ～ 第二機 》蟹肉南瓜忌廉湯


今次試咗用 '濃湯功能'做了個南瓜蟹肉忌廉湯，只須將材料放入機內話咁快就有美味濃郁嘅湯飲 真係方便到不得了呢👍🏻
南瓜蟹肉忌廉湯食譜～by hanhan ⋯⋯
材料：
南瓜 450g
洋蔥 50g
蟹肉 200g
淡忌廉 50g
鹽 少許
水

做法：
1. 先將蟹洗淨蒸熟拆肉備用
2. 南瓜 與 洋蔥切粒粒
3. 將以上材料倒入 豆漿濃湯機內再將水注入至Max與Min之間蓋上蓋鎖好後按（Puréed soup 濃湯功能）
4. 聽到咇咇聲後打開煲蓋將鹽加入調味
5. 將淡忌廉加入湯內拌勻即可享受鮮味嘅 南瓜蟹肉忌廉湯

Philips 豆漿濃湯機 食譜 ～ 第四機「紅豆薏米糊」

2015-5-15

我又玩嘢喇，hehe 

今日用咗部 '豆漿濃湯機'試吓個米糊功能做咗個紅豆薏米糊

因為近年暴飲暴食 肥咗好多（我已經知衰喇）T^T

呢排都有去吓跑步，行吓樓梯同減少食量

可惜我咁努力都冇瘦到 >.<"

睇中醫 醫師話我濕重體虛，要多食去濕食物去隨體內濕氣，水腫，血氣行得好減肥就好easy

所以今日即刻走去買咗包紅豆 同埋薏米 

因為紅豆，薏米都含有大量膳食纖維，能夠促進腸蠕動，潤腸通便，幫助排走毒素，健脾去濕，解決虛胖 令臉色紅潤，女性多吃有益呢！

今日就開始我嘅瘦身 養身食療先^0^

紅豆薏米糊 ～ Han made

材料：

紅豆。  100g

薏米。   50g

冰糖。   50g 

水

做法：

1. 先將紅豆浸3小時，薏米浸1小時後隔水備用

2. 將紅豆 薏米 放入'豆漿濃湯機'內，加水至max & min 之間

3. 蓋上蓋後選擇rice paste(米糊）功能，完成後加入冰糖拌溶即可享用

我要飲湯 ^^

2015-5-7

紅蘿蔔青木瓜粟米椰子海底椰煲豬𦟌！

喺fb 睇見班損友呢排密密煲湯飲

（流哂口水呢）！

好唔抵得哋今日即刻去買料，我又要煲番煲靚湯飲吓！

好喜歡現今嘅大型新式街市，為方便顧客會將新鮮材料洗淨分好分量再包好讓客人選購

只要買一包湯料再到肉檔買嚿煲湯肉就可以回家煲湯了

唔使再好似以前咁要買一埋材料洗洗批批切切咁麻煩（啱哂我呢啲懶鬼）：P

由於剛剛病好所以只買了這份簡簡單單 清清哋嘅湯料再+嚿豬腱

回家沖洗一吓材料，豬腱汆水煲兩小時就飲得^^

Philips 豆漿濃湯機 ～ 第三機，卡邦尼芝士年糕

2015-05-03
病咗差不多一星期每日唔係飲藥就係食粥或者通粉&豬仔包（唔知點解每次生病都喜歡食芝麻豬仔包）：P
呢兩日終於趕走咗病魔，～ yeah
口啖啖咗多日 好想食啲濃味食物刺激番味蕾^^
今日行超市竟然比我再遇上（你）yeah yeah yeah ~
煮意嚟喇！
就係卡邦尼芝士年糕

• 曾經在某食店食過呢款年糕，覺得唔錯，今晚一於試吓自家製先 嘻嘻！

我仲搵咗個好幫手 》就係 Philips 嘅豆漿濃湯機。

今次用咗Chunky soup(粒粒湯功能）

只須將預備好嘅材料放哂入機內加水 然後鎖上蓋 按制 開動 我就可以離開去做其他嘢

唔水半粒鐘當聽到咇咇聲後即係製作完成，有得食喇 真係超方便呢。

卡邦尼芝士年糕 ～ hanhan made 

材料：

韓式年糕。  400g

芝 士。        兩片

煙 肉。        兩條（切幼條）

洋 蔥。        半個（切幼條）

淡忌廉。      250g

蛋 黃。         1隻（打發成蛋液）

蘑 菇。        4粒（切細粒）

香草。         半茶匙

水

做法：

1. 將年糕沖一沖水備用

2. 將煙肉，蘑菇，洋蔥用少許油炒香備用

3. 將以上材料放入'豆漿濃湯機'內再加入淡忌廉，芝士片，蛋黃，香草。

4. 然後加水至Max與Min之間， 蓋上蓋後選擇Chunky soup(粒粒湯功能)然後開動。

完成後即可享用。