白汁蝦蝦芝士焗意粉 ~ (食譜 )
呢排真係好忙 , 好忙 !
好多時都早出晚歸
冇時間買餸煮飯
成個星期多數都係出街食
今日終於得閒
所以好想煲煲湯飲吓 , 整吓嘢食吓 ~
諗起好耐都冇整過西餐食
今日一於整番餐意粉食先 !
頭盆 : 南瓜茸湯
主菜 : 白汁蝦蝦芝士焗意粉
南瓜茸湯 > 南瓜半隻起肉切件 , 瘦肉切粒 .
照平時煲湯咁水滾後落材料煲半個鐘 , 將南瓜同肉粒撈起倒入攪拌機內攪至變茸冇粒粒 , 再倒回煲內煲滾加鹽調味即可 . ( 可以加入淡忌廉同煮 , 加入淡忌廉後就變成西式嘅忌
廉南瓜湯 )
白汁蝦蝦意 >
意粉1/2包 , 急凍蝦仁 , 蟹柳絲 , 啡蘑菇 , 紫色洋蔥 , 鮮奶 , 淡忌廉 , Mozzarrella芝士 , rosemary .
先將意粉煮好備用 .
蝦仁解凍後炒熟 . 啡蘑菇切片 + 洋蔥切幼條 一起炒熟 .
倒入一杯鮮奶 , 半杯淡忌廉拌勻 加鹽調味 ( 落鹽可以多少少 , 因為意粉冇味拌勻之後就會啱啱好夠味 )
落意粉拌勻後 舀起倒入焗盆中 , 將芝士平均洒上 , 放入焗爐用 200 c 焗10分鐘或睇見啲芝士已經溶化微焦即可 .
( 早前睇見一篇報導講"紫色洋蔥"比起"白洋蔥"對人體更有益 , 因為紫色洋蔥除咗有哂白洋蔥嘅功效之外 , 更多咗一種可以幫人體清除壞膽固醇嘅功效 )
可以清除壞膽固醇
咁咪好啱我哋呢班鐘意整包 , 整餅 , 整蛋糕 , 煮美食嘅卜友食 . 因為我哋成日都整咁多好嘢食 , 身體內一定積聚咗唔少壞膽固醇 
所以我就介紹話俾大家知 , 希望大家多買呢隻"紫色洋蔥 "嚟食 , 幫助清除身體內嘅壞膽固醇 , 咁大家就可以放心繼續整多啲美食都唔怕啦
沒有留言:
張貼留言