2010年7月27日下午1:14公開累積瀏覽 683
26 - 07 - 10 ~ Birthday Dinner 
尋日係我 "老細”之大壽
一早就問定佢想食乜
一陣又話好耐都冇食過鐵板燒 ~ 想食
轉過頭又話想食龍蝦
得 , 得 , 得 , 冇問題 , 想食咪去食囉 , 話哂都係你牛一 , 想食乜我咪請你食乜 , 算係咁啦
所以前晚就上網搵咗好多間食店資料 , 搵咗幾間心水店鋪俾佢揀 , 有日式鐵板燒 , 韓燒 , 日本料理 & Buffet .
點知佢睇完之後話 > 食鐵板燒 ,韓燒全部都係肉好漏喎 , 食日本料理又好似冇咩特別好味嘢食 , 而家
啲胃口細咗咁多食 buffet 仲唔抵 , 都係唔好出去食 , 不如去買隻大龍蝦返嚟自己整咪仲好味
吓 ~ 買隻龍蝦返嚟咪 又要我 整餐 c
哎 ~ 算啦 , 見係你生日咋 , 你話咩就咩啦
所以尋日過咗去九龍城食完晏之後就出咗旺角街市買龍蝦
出到去本來諗住買番隻澳洲龍蝦食 , ( 因為咁多龍蝦之中澳洲龍肉質係最鮮味) 點知行哂咁多檔海鮮檔都搵唔倒澳洲龍
問吓啲亞姐先知原本澳洲龍來貨好貴 , 冇人敢入貨 , 怕賣唔去蝕本 喎
買唔倒澳洲龍蝦唯有揀印尼龍蝦啦 , ( 雖然印尼龍蝦唔夠澳洲龍蝦咁鮮味 , 但係肉質都唔差 , 啖啖肉又爽口 )
最後我哋揀咗全檔最大嗰隻有兩斤半重 , 盛為$6 張紅衫魚
返到屋企首先將龍蝦放入冰格雪1- 2 小時
等佢瞓咗然後至落鑊隔水 30分鐘取出攤凍 .
龍蝦凍食 ~
將蝦身肉一開二雪凍後 加沙律醬就咁食 ~ 入口啖啖肉 ~ 爽呀
龍蝦什果沙律 ~
我將啲龍蝦嘅腳趾 , 觸鬚同埋頸位嘅肉用咗嚟整沙律 .
乾燒伊麵 ~
隻龍蝦好多膏所以我就將啲膏攞嚟炒伊麵 , 食落啲麵好甘香 ~ 正 !
再嚟一個 ~ 煙牛肉片沙律菜
老細至愛嘅龍蝦 生日大餐 ~ 搞掂
特別鳴謝 ~ "老細" 幫我將隻龍蝦開邊拆殼 
2010年7月20日下午5:15公開累積瀏覽 440
2010年7月18日下午1:00公開累積瀏覽 379
焗燶麵包 ~ 
05 - 07 - 10
上星期一晚見得閒所以又想整包包 
諗起之前買咗包豬肉鬆都未食過 , 一於攞嚟整肉鬆海苔包 
搓粉 , 造型 , 發酵全部都好順利 !
點知 ~ 到焗嗰陣掛住睇電視 , 唔記得睇火同埋加番將鍚紙上去蓋住個包面 , 搞到個包面燶哂呀
睇住個焗燶麵包都唔知點算好 , 掉咗佢又好似好嘥咁 
佢只不過係個面燶咗啫 , 其餘嘅冇事喎 , 一樣食得架 
將個包面燶咗嗰部份切咗佢咪食得 , 嘥都係嘥少少啫 
個包包雖然係焗燶咗 , 但係內裡好軟熟 , 第二晚食都仲好鬆軟 , 唔錯架 !
2010年7月16日下午8:43公開累積瀏覽 1226
滷水牛腱 ~ (食譜 )
14 - 07 - 10
星期日又無無聊聊兩條友坐响樹講起 " 嚿使 " 
提起一個好耐好耐都見過嘅人 , 一提起佢就諗起佢嘅撚手小食 ~ 滷牛腱 .
想食 ~ 即刻走去摷番佢俾低嘅食譜出嚟 ~ 整 .
佢俾嘅滷牛腱食譜教落要將嚿牛腱滷三日至食得架 
我就更係會跟足佢嘅秘方嚟整啦 !
等呀等 , 今日係第三日 , 終於都食得喇 
滷水牛腱 ~ Hanhan
材料 :
牛 腱 2斤
草菇老抽 1支
清 水 兩支
丁 香 5-7粒
八 角 2粒
玫瑰露酒 半湯匙
鹽 1 茶匙
冰 糖 大半斤 ~ 一斤
做法 :
1. 先將牛腱解凍 .
2. 然後煲一煲要蓋過牛腱嘅水 , 水滾後落牛腱煲1 小時熄火取出過冷河 .
3. 將 2支清水加1 支老抽煲滾後加入丁香 , 八角 , 冰糖 , 鹽 , 牛腱 , 玫瑰露酒一齊煲 .
4. 待滷水汁滾起後5 分鐘蓋上蓋熄火焗 一日 .
5. 第二日將滷水汁滾起後5 分鐘熄火再焗一日.
6. 第三日重覆一次 , 然後取出放涼後放入雪柜雪凍 , 食時取出切片或粒上碟 .
提示 :
落冰糖時記住唔好一次過落哂 , 先落1/3煮溶後再邊試味邊調教至啱自己嘅甜度 , 記住滷水汁可少甜 , 唔可以太咸 , 因為牛腱要浸3 日, 如果滷水汁太咸的話 , 浸咗3 日嘅牛腱就會入哂味好咸架喇 .
2010年7月7日上午12:33公開累積瀏覽 1016
惠康獨家推出全亞洲首套
史力加 與 Dream Works 好友 ~ 大頭公仔系列
發布會
多得硬琳推薦所以今日有幸參與 
多謝惠康公關小姐 : Shanice Wong 嘅邀請 令我可以參與呢個開心發報會 , 雖然我贏唔倒 20吋大嘅史力加公仔 & 獎品 
但係每位有份參與嘅來賓亦有一份禮物 包括有 :
史力加大頭公仔 & 惠康購物禮券 
會場嘅佈置全部以史力加 , 荒失失奇兵 & 功夫熊貓 為主題
今次嘅發報會係推廣 由7 月9 日起惠康獨家呈獻全亞洲首套及唯一一套 史力加與 Dream Works 好友大頭公仔 .
亦係惠康首次夥拍 Dream Works SKG (夢工場 ) 推出 - 史力加與 Dream Works好友 的大頭公仔免費換領計劃 .
一套共有八款公仔 , 包括今年暑假推出猛片 :
( 史力加萬歲萬萬歲 ) 主角 : 史力加 , 驢友 , 貓貓 , 薑餅人 .
(荒失失奇兵 ) : 獅子阿力 , 斑馬馬提 .
(功夫熊貓 ) : 熊貓阿寶 , 飛虎女 .
每款公仔約7 - 9 吋 , 最大特色係以頭大身細嘅可愛造型設計 , 大人細路必定會愛不釋手 .
如果想擁有一套咁可愛嘅大頭公仔 , 大家可於7 月9 日開始至9 月6 日到惠康購物滿 $ 60 元即獲印花一個 , 只要儲齊 50 印花就可以帶佢哋返屋企架喇 !
截止換購日期 為 > 2010年9 月30 日 .
大家記住 快啲去儲印花換購喇 !
( 如想可以更快儲齊花 , 大家可以購買1 種或指定數量之 ~ 印花精選 貨品即可獲得多一個印花 , 亦可於星期六 , 日購物滿 $300元 , 即可獲得雙倍印花 )
除左換公仔之外,保留換領收據仲有機會贏取大獎
頭獎(1名)荷李活6日4夜4人豪華遊 與史力加動畫大師見面!二獎(4名)新加坡4日3夜家庭遊 4人暢遊環球影城主題公園!(有關參加詳情"WELLCOME"即將公佈)記住呢個換購活動7月9日開始,快D儲齊印花喇,幸運兒可能會係你架
2010年7月1日下午11:58公開累積瀏覽 421
7 - 1 慶 ~ 回歸
今日係 7 月1 號 香港回歸週年紀念日 
相信好多港人都安排咗節目慶祝 , 我哋都唔例外 .
我嘅慶祝節目就係煮晚餐邀請"乜師奶"佢哋嚟食 
所以一起身梳洗完就出街食晏 , 食完嘢就去街市買餸預備今晚嘅晚餐 .
今日嘅天氣好好 , 太陽伯伯都好開心咁一齊慶回歸 , 不過就難為咗我 , 响條街度行咗一陣已經哂到我出哂汗 
嗱嗱淋買齊嘢速速返歸第一件事就係 ~ 開冷氣 
一邊嘆冷氣一邊預備晚餐 .
等到成7 點都唔見人嚟 , 就叫"老細'電一電佢睇吓出門口未 .
唔電就由自可 , 一電就扯哂火
都唔知嗰兩條友點溝通架 , 一次又係咁 , 兩次又係咁 , 上次就互相模門釘 , 講明去妳屋企食 , 點知妳聽錯就走咗嚟我度 , 最終搞我哋要趕返嚟買外賣 一齊食
今次叫妳過嚟食 , 點知又聽錯 , 變咗妳有妳煮妳等 , 我有我煮我等 
最終佢都過咗嚟食 , 不過都係得佢一個嚟 , 又唔早啲出聲等我唔使整咁多嘢 , 搞到又食唔哂 
殘忍啲都要做一次架喇 , 唔該妳打包返去食埋佢
南瓜茸湯 ~
我將南瓜 & 瘦肉煲淋再用攪拌器打至變茸再煲多一陣 , 好濃郁呢
喬麥冷麵 ~ 食唔哂 
煙肉粟米蘑菇千島汁啤酒薄餅 ~
係呀 , 又係啤酒薄餅呀 , 呢個用咗千島汁 ~ 我鐘意 
啡菇洋蔥茄醬啤酒薄餅 ~
乜師奶就話呢個好味啲喎 !
威靈頓牛肉餡餅 ~
今次整得幾靚仔 跟 darling 用啡菇整真係香好多架 .
