2010年5月31日下午10:15公開累積瀏覽 588
芒果意粉 ? 涼粉 
個 C 佬尋晚至話我知佢今晚返夜叫我唔使煮飯 
都唔知係咪專登嘅 , 專登咁遲至話我知 , 等我趕唔切約人去街街 
陰謀 
哼 .你唔好以為咁我就會乖乖呢响屋企 ~ 等你 ~ 好難 lu 
我同班"持家人" 飲完茶 , 再去剪個髲 , 然後去行街街行夠至返屋企都不知幾爽 
返屋企前經過街市諗住買番啲橙 , 點知睇見啲芒果又想食 
買 !
跟手一個轉身睇見豆腐檔有涼粉 , 涼粉呀 
返到屋企即刻將啲芒果肉攪茸然後雪粒粒 , 食唔哂留番可以整其他甜品
啲涼粉我用咗 Joe joe 送俾我個新玩具 , 果凍制條盒整 , 整出嚟一條條似麵又似意粉 , 有得玩又有得食 
多謝 joe joe !
等啲芒果茸粒 溶咗拌埋啲涼粉一齊食 ~ 正呀 !
2010年5月30日下午2:35公開累積瀏覽 402
啤 一 啤佢 ~ 
尋晚終於 , 終於都記得買黑啤喇 
話說早幾 , 幾 , 幾日前請教咗超級高手 Darling 教我整啤啤包之後 , 滿心歡喜咁諗住出街買啤酒啦 . 點知一出到街就俾其他嘢吸引住 , 掛住買其他嘢就係唔記得買啤酒 
如是者之後每日出街都提自己 : 記得買啤酒呀 , 記得買啤酒呀 . 
點知都係唔記得買 
直到尋晚星期六 , 出街食完晚飯後終於都記得喇 
返到屋企立即開工 ~ ~ 整 !
整呀整 , 整呀整 , 終於搞到半夜點幾兩點鐘至掂哂所有程序 , 最後將啲麵包做埋形之後就放入雪柜 留番今日焗 .
所以今朝一起身就响雪柜攞咗啲粉糰出嚟回溫至焗 .
點知焗到咁上下至記起我唔記得掃蛋液呀 
冇辦法啦 
唯有照焗 .
新鮮熱辣嘅 黑啤包 出爐喇 !
即刻攞咗個嚟試食 , 個包真係好香好軟熟 , 好正呀 
唔記得掃蛋液上面所以焗出嚟個面有啲乾 , 唔夠靚仔 .
2010年5月25日下午11:20公開累積瀏覽 456
又嚟無飯煮意喇 ~
( 附加雞絲粉皮食譜 )
今日天氣都係好熱 , 出街打咗個 Round 番到屋企個燈罩已經濕哂 
即時放低哂所有嘢 , 除低哂所有嘢走沖番個凍水涼 ~ 嘩 ~ 爽哂 
哎 ~ 都未正式到夏天都覺得熱 , 熱 , 熱 .
如果夏天真真正正咁嚟到點算好呢 
哎 ~ 都係唔好諗咁多喇 , 到時咪最多交多啲電費 ~ 係我老細
今日又去咗九龍城買嘢 , 見天氣熱辣辣就走去買咗十塊新鮮粉皮 , 今晚一於整個冷盤 " 雞絲粉皮 " 涼快吓先 !
我唔鐘意食雞胸肉怕佢 " 嚡烚烚 " 
就用咗雞脾肉代替 , 所以整出嚟唔會一絲絲 , 唔靚 , 不過就好味 
雞絲粉皮 ~
No No No 
應該係雞柳 , 雞件 or 雞條粉皮至啱 
海鮮烏冬 ~
( 原本諗住煮個真打烏冬只係落蟹棒 , 粟米 , 海帶, 牛油 , 點知"老細"話不如攞兩隻甜蝦刺身整熟加落去睇吓好唔好食囉 ) 食落發覺整熟咗嘅甜蝦係 ~ ~ ~ 唔好食架
骨附腸 ~
個名好怪 , 不過幾好味
雞絲粉皮 ~ 食譜
材料 : 新鮮粉皮十塊 , 溫室青瓜一條切絲 , 雞胸肉 or 雞脾肉 烚熟放涼切絲 ,
我的做法 :
將切咗絲嘅青瓜 & 雞絲分開蓋好放入雪柜雪凍 ( 雞絲可以唔雪都得 )
將粉皮卷起切半吋闊 , 煲滾水然後落粉皮拖一拖水挑散熄火後倒落筲箕相隔水 , 然後用凍開水浸住粉皮入雪柜雪凍 .
將雪凍嘅粉皮隔去所有水份至乾身 ( 可用抺手紙印去淨下水份放入碟中 , 加上青瓜絲 , 雞絲 , 最後淋上醬汁即可 .
呢個麻醬我係用日式芝麻冷麵醬撈落去食架 , 因為鐘意佢有醋嘅成份 , 麻香得嚟帶有醋香 & 少少酸甜 ~ 好味 .
